Fundi i ndeshjes mes Shqipërisë dhe Islandës ishte i trishtë. Shqipëria mori një barazim zhgënjyes në minutat e fundit të takimit përballë Islandës, duke na lënë të fundit në fushatën e Ligës së Kombeve. Rezultatet e dobëta në dy ndeshjet e fundit duket se i ka lënë një shije të hidhur mbështetësve që ishin në stadium, por edhe trajnerit të kombëtares Edi Rejas.
Reja tha se rezultati ishte një dështim. Ndër të tjera ai u shpreh se është munduar t’I japë dinjitet Shqipërisë, duke lënë të kuptohet se në fund të kontratës dhe të këtij kompeticioni mund të divorcohet me kombëtaren shqiptare.
“Nuk mund ta them tani, pasi do bëjmë analizën për punën e bërë, duke thënë këtë duhet të takohem me presidentin. Por jemi të zhgënjyer të gjithë, sigurisht kur nuk vjen rezultati duhet bërë një analizë, unë mendoj se i kam dhënë dinjitet Shqipërisë, por nuk kemi rezultate. Të paktën duhet të kishim arritur vendin e dytë, por ishte një dështim”, tha Reja.
