Prokuroria e Tiranës kërkoi sot sekuestrimin e pasurive të Altin Gegës. Ky person është i akuzuar për drogë ndërsa dyshohet se pasurinë e ka vendosur pikërisht me këtë aktivitet të paligjshëm.
Hetimet e Prokurorisë treguan se Gega, i cili njihet edhe me mbiemrin Çoku, është i përfshirë në trafik të lëndëve narkotike, kanabis e kokainë, në Shqipëri, Itali, Holandë dhe Gjermani. Prokuroria thotë se familjarët e Altin Gegës nuk arrijnë t’i justifikojnë pasuritë nga pikëpamja ekonomike.
Ai u arrestua në Korrik të 2021 pas një operacioni anti-drogë ku u sekuestruan 1 kilogram kokainë. Në atë kohë qarkulluan videot se si Altin Gega i ikën forcave Operacionale në mes të Tiranës. Pas këtij dështimi operacioni policia në gjaknxehtësi e sipër nisi edhe ndalimin e gazetarëve që ishin të pranishëm në zonë. Ai arriti të arrestohej pak më vonë.
