Partia Demokratike vazhdon me denoncimet për aferën e inceneratorëve. Sot në një deklaratë për mediat Jamarbër Malltezi ka akuzuar qeverinë se ndryshoi strategjinë për inceneratorët, në mënyrë që të vidhte më lehtë dhe kontratat të financoheshin në shkelje të ligjit. Ai tha se kontratat e nënshkruara bien ndesh me planin fillestar të veprimit dhe milionat po i ndajnë bashkë Rama me oligarkët që janë në krye të inceneratorëve. Sipas tij, drejtësia dhe Soros i ndajnë paratë bashkë, ndërsa shtoi se po paguhet shumë në mënyrë që afera e inceneratorëve të varroset.
“Paguhet shumë për ta varrosur aferën e inceneratorëve, me të cilën kanë vjedhur 105 milion euro deri tani, dhe vijojnë çdo ditë. Jo vetëm para’ të shqiptarëve, por edhe taksapaguesve europianë. Bashkimi Europian ka dhënë 4 milionë euro për përafrim legjislacioni mjedisor përmes projekteve STEMA dhe Selea. Sapo u sinkronizuan ligjet, u hartuan Strategjia dhe Plani Kombëtar i Mbetjeve. Këto u injoruan dhe u vrapua pas një propozimi të pakërkuar për inceneratorë. Inceneratorët bien ndesh, qoftë me strategjinë, qoftë me planin e veprimit të financuara nga Bashkimi Europian”, tha ai.
Ndërsa më poshtë janë publikuar pesë pyetjet e PD për SPAK:
- Pse u dhunua Strategjia dhe Plani Kombëtar për Menaxhimin e Mbetjeve që ishin në fuqi?
- Pse u firmos kontrata, ndonëse APP kish sqaruar se procedura ishte e kundraligjshme?
- Edi Ramën e zuri ndonjë hall i madh apo bëri ndonjë pazar po kaq të madh që firmosi kontratë në kundërshtim me ligjin?
- Pse u mashtrua sikur kompania e sapokrijuar kishte eksperiencë të madhe me incenerimin? Si qëlloka që miqtë e Edi Ramës dhe Arben Ahmetajt qenkan ‘nonat e incenerimit’?
- Çfarë halli apo pazari e detyruan Edi Ramën që gënjeu sikur u kryen 10 procedura brenda 1 dite?
Këto janë pyetje shumë të thjeshta për shqiptarët, por shumë të vështira për drejtësinë e Soros.
