Masakër në Elbasan: vriten tre persona , ndërsa 7 të tjerë janë plagosur dhe janë në gjendje të rëndë. Gjithçka ka ndodhur si pasojë e një përplasje mes bandash, të cilat kanë terrorizuar banorët në zonën e Krastës.
Disa persona kanë hapur zjarr me armë automatike në drejtim të lokalit, ku për pasojë dy persona kanë gjetur vdekjen e menjëhershme dhe 8 të tjerë janë plagosur, njëri prej të cilëve ka ndërruar jetë pak më vonë në Spitalin e Elbasanit.
Personat që kanë humbur jetën në këtrë masakër janë: Agron Çapja, Ardit Sinakoli, Eno Bedalli.
Ndërsa, të shtatë të lënduarit janë: Luan Muça, Ferid Muça, Bujar Rreshka, Ardian Zharri, Fejzullah Çapja, Florenc Çapja, Arnold Çapja.
Forca të shumta policie kanë mbërritur në vendin e ngjarjes dhe kanë bllokuar qarkullimin përgjatë gjithë aksit Elbasan-Librazhd si dhe janë ngritur postblloqe në rrugët e tjera dalëse të qytetit. Në Elbasan ka shkuar edhe ministri i Brendshëm, Saimir Tahiri.
Personat e plagosur kanë marrë ndihmën e parë mjekësore në spitalin e Elbasanit dhe policia thotë se dy prej tyre ndodhen në gjendje të rëndë për jetën. Ata u transportuan me helikopter drejt Spitalit të Traumës në Tiranë për ndihmë më të specializuar. Atje ka shkuar edhe ministri i Shëndetësisë Ilir Beqaj për të ndjekur nga afër situatën.
Ndërkohë policia me forca të shumta në terren ka bllokuar qarkullimin përgjatë gjithë aksit Elbasan-Librazhd. Policia informoi se: “Menjëherë në ndihmë të policisë së Elbasanit janë nisur forcat speciale RENEA, FNSH e Tiranës , FNSH e Fierit. Janë angazhuar forcat policore të komisariateve Lushnje, Fier, Berat, Durrës. Eshtë krijuar perimetri rrethues ku janë bllokuar të gjitha pikat hyrëse e dalëse me Elbasanin”.
Deri tani policia ka shoqëruar 46 persona. Nga hetimet paraprake të policisë, dyshohet se ngjarja ka ndodhur për hakmarrje për ngjarje te ndodhura më parë. /27.al/
