Qytetarët e Shkodrës vazhdojnë protestën për të kërkuar drejtësi për ish-shefin e policisë të arrestuar pak kohë më parë. Bëhet fjalë për Saimir Rrustemin, ish-Shef i Rendit në qytetin verior, i cili së fundmi ishte transferuar në sallën operative të Policisë në Dibër, ku më pas u arrestua së bashku me 14 punonjës të policisë e ish-zyrtarë. Qytetarët shprehen se qeveria po bën padrejtësi, pasi kërkon që të punësojë policë të korruptuar dhe të largojë ata të ndershmit. Një prej protestuesve tha se, Saimir Rustemi është një nga efektivët që duhet marrë shembull, pasi gjatë pandemisë ka shërbyer dhe rrezikuar jetën e tij për qytetarët pa asnjë përfitim.
“Si gjithë qytetarët e tjerë kam ardhur për të mbështetur komisar Saimir Rrustemin sepse është një njeri I ndershëm, një ndër më shembullorët. Në çdo sfidë është parë vetëm ky polic në pandemi është parë vetëm ai në çdo sfidë madje edhe në hashash. Kjo qeveri do horra dhe hajdutë nuk do policë të ndershëm që bëjnë punën. Drejtësia duhet të bëjë punën e saj dhe të japë vendimin e drejtë sepse Saimiri është ndër djemtë që gjithë Shkodra e nderon”, u shpreh një tjetër protestues.
Ndërkohë një tjetër tha se, kjo që po i bëhet Saimirit tregon padrejtësitë dhe shkeljet që iu bëhen çdo ditë qytetarëve. Sipas tyre, Saimir shpesh ka sakrifikuar edhe familjen për të bërë një punë të ndershme. Ndërsa u shprehën se padrejtësitë që po përballen çdo ditë, po i detyrojnë ata që të largohen nga vendi.
“Jemi të irrituar për këtë çështje. Duhet të jenë edhe disa kolegë të tij që e njohin më shumë se ne dhe të reflektojnë se çfarë pune ka bërë Saimiri. Jo vetëm Saimirit por gjithsecilit prej nesh na ka ardhur në majë të hundës sepse po bëhen padrejtësi pasi këto po i shohim përditë. Unë mendoj se Saimiri ka bërë një punë të jashtëzakonshme që rrallë kush e bën, është një njeri I ndershëm që ka sakrifikuar familjen, jetën në shumë raste dhe kjo qeveri duhet t’i vlerësojë këta njerëz. Ndryshe ka vetëm një rrugë të ikim nga ky vend sepse nuk durohet më!”, tha një mbështetës.
