Pas disa muajve qetësi, kurba e të infektuarve me koronavirus ka filluar sërish të ndjekë trend rritës. Kjo gjë ka rikthyer alarmin te mjekësia dhe shqetësimin te qytetarët. Numri i të prekurve, sipas specialistit të Institutit të Shëndetit Publik, Artan Simaku, parashikohet të vijojë rritjen deri në mes të gushtit, për shkak të temperaturave të larta dhe lëvizjeve të shumta.
“Vijon trendi në rritje i rasteve ditore, dhe ky trend parashikohet të jetë në rritje për dy deri në tre javët në vijim.”
Aktualisht virusi është i shpërndarë në 50 bashki të vendit. Më shumë se turizmin përgjegjës për përhapjen e shpejtë të infeksionit specialistët e shëndetit publik bëjnë nënvariantet e reja tepër të transmetueshme të “Omicron”. “Ka rritje uniforme të rasteve, por jo të dukshme në zonat turistike krahasuar me bashkitë e tjera të vendit. Fluksi i udhëtarëve dhe turizmi është parë që nuk luajnë rol të rëndësishëm, ka dyshime për qarkullim të nënvarianteve të reja”, tha ai.Ndërsa më tutje tregoi se, të rinjtë dhe moshat mbi 65 vjeç përbëjnë numrin më të lartë të të infektuarve. Për të shmangur transmetimit e virusit mjekët apelojnë për t’ju rikthyer maskave dhe distancimit fizik. Sipas të dhënave, numri i të infektuarve aktiv në të gjithë vendin i ka kaluar 9 mijë persona. 30 prej tyre po marrin ndihmë mjekësore në spital ndërsa pjesa tjetër po kurohen në shtëpi.
