Për Pjaniç dhe Benatia kanë mjaftuar vetëm 15 minuta për t’i treguar tifozëve të tyre të rinj se sa të rëndësishëm do të jenë për këtë Juventus. Goli i dytë i Juves ndaj Totenhem ishte i gjithi i tyre. I pari dërgon një asist dhe tjetri bën një goditje perfekte me kokë. “Ta mbyllim mirë këtë turne dhe më pas të kthehemi për të punuar edhe më shumë”, ka thënë Pjaniç pas takimit të Melburnit, ku performanca e tij u konsiderua pozitive. “Ishte një ndeshje e mirë, megjithëse ka ende gjëra për t’u përmirësuar. Zbatuam detyrat e dhëna nga trajneri, fituam dhe jemi të kënaqur”, vazhdon komentin e tij mesfushori boshnjak, duke iu referuar fitores 2-1 ndaj nënkampionëve të Anglisë. Në programin e Juventusit është edhe një tjetër miqësore, këtë rradhë në Hong Kong dhe më pas do të fillojë numërimi mbrapsht në pritje të ditës së parë të Serisë A. Kjo ishte një provë e mirë edhe për portjerin Brazilian Neto, i thirrur për të zëvendësuar Bufon ende me pushime.
