Pa debate ka nisur sot seanca e fundit për këtë sesion parlamentar në Kuvendin e Shqipërisë. Deputeti Ervin Bushati ftoi palët politike që të zgjasin periudhën e konsensusit në të mirë të qytetarëve. E menjëhershme ishte dhe përgjigja e kolegut të tij demokrat, Edi Paloka, i cili theksoi se opozita ka mbështetur gjithmonë projektligjet që kanë të bëjnë me qytetarët, ndaj ftoj qeverinë që të mbajë premtimet për reformën në drejtësi.
Ish-kryeministri Sali Berisha e ka kthyer sërish vëmendjen tek reforma në drejtësi, duke theksuar se kalimi i saj me konsensus të plotë në Kuvend, i shërben çdo qytetari shqiptar. Berisha theksoi se maxhoranca u nda në këtë proces, pasi një krah i rëndësishëm i saj (LSI) nuk pranoi kapjen që sipas tij, qeveria po tentonte ti bënte sistemit të drejtësisë.
Sipas Berishës, nga ky konsensus fitoi Partia Demokratike dhe LSI-ja, që siç tha ai, në momente kritike mes konsensusit dhe bashkëqeverisjes zgjodhi konsensusin.
Seanca plenare ka në rendin e ditës 8 pika, midis të cilave dy marrëveshje konçesionare, ndryshime në kodin penal dhe ligji për rivlerësimin e pasurisë. Drejtuesja e seancës plenare të Kuvendit, Valentina Leskaj në nisje të punimeve të seancës njoftoi se Komisioni parlamentar po vijon punën për 7 projektligjet që janë ligjet bazë dhe që e bëjnë të zbatueshëm projektin kushtetues, të votuar me unanimitet në parlament.
BERISHA: MAXHORANCA U NDA, NJË KRAH I SAJ NUK PRANOI KAPJEN E DREJTËSISË
Ish-kryeministri Sali Berisha e nisi fjalën e tij në Kuvend me kërkesën për të mbajtur një minutë heshtje për viktimat e sulmit në Mynih, ku humbën jetën edhe 3 të rinj shqiptarë.
Më pas, Berisha e ktheu sërish vëmendjen tek reforma në drejtësi, duke theksuar se kalimi i saj me konsensus të plotë në Kuvend, i shërben çdo qytetari shqiptar.
Por ish-kryeministri theksoi se maxhoranca u nda në këtë proces, pasi një krah i rëndësishëm i saj (LSI) nuk pranoi kapjen që sipas tij, qeveria po tentonte ti bënte sistemit të drejtësisë.
“Të enjten që kaloi reforma në drejtësi u votua në parlament me konsensus të plotë. Kjo ishte maratona më e gjatë dhe akuza të ashpra, me negociata të vështira në nivele të larta.
Konsensusi i kësaj reforme nuk ishte konsensus i vullnetit të mirë, konsensus i dëshirës apo zemrës së të gjitha palëve siç duhet të ishte. Konsensusi i 22 korrikut ishte i imponuar deri në orën e fundit nga njëra palë. Në këtë konsensus udhëhoqi opozita, jo me kërcënime, apo miliona eurove ndoshta të vjedhura në aeroport, por ata çanë çdo kusht, çdo bllokim që iu përpoqën ti bëheshin padrejtësisht asaj. Një krah i rëndësishëm i maxhorancës ndau dhe mbrojti me opozitën parime dhe vlera. Në një moment kritik u nda me qeverinë që donte të kapte me çdo kusht drejtësinë.”- deklaroi Berisha.
Sipas ish-kryeministrit, nga ky konsensus fitoi Partia Demokratike dhe LSI-ja, që siç tha ai, në momente kritike mes konsensusit dhe bashkëqeverisjes zgjodhi konsensusin.
“Kush fitoi? Në veçanti fitoi PD-ja, e cila nga e përjashtuara e madha e në fillim të procesit, u bë promotore e reformës. PD nisi pjesëmarrjen në këtë proces e dënuar marrëzisht nga përpjekja për konsensus. Megjithë qëndrimin e Edi Ramës që në fillim të punës, gjer orën e fundit punoi pa u lëkundur dhe qëndroi e gatshme të paguante çdo çmim për konsensusin që i duhej Shqipërisë. Në këtë arritje historike të PD-së një rol thelbësor ka luajtur mbështetja e fuqishme e qëndrimeve të PD-së nga aleatët tanë si dhe qëndrimi i vendosur pro konsensus i zotit Ilir Meta.”- deklaroi Berisha”.
