Policia e Tiranës ka vënë në pranga ditën e sotme pronarin e një ndërtese në Kashar ku ka humbur jetën ditën e djeshme punonjësi 57-vjeçar. Mësohet se viktima teksa ishte duke punuar aksidentalisht ka rënë nga lartësia e objektit ku po punonte e për pasojë ka ndërruar jetë.
Gjithashtu lidhur me ngjarjen janë shpallur në kërkim 2 të tjerë për veprat penale “Ndërtimi i paligjshëm” dhe “Shkelja e rregullave të mbrojtjes në punë”, “Fshehja e të ardhurave”, “Punësimi i paligjshëm”, “Ndërtimi i paligjshëm”.
“Specialistët për Hetimin e Krimeve në Komisariatin e Policisë Nr. 6 bënë arrestimin në flagrancë të shtetasit R. B., 33 vjeç, banues në Tiranë.Gjithashtu bënë shpalljen në kërkim të shtetasve: A. A., 62 vjeç, administrator i një firme ndërtimi dhe L. A., 29 vjeç, me detyrë drejtues teknik, të dy banues në Lushnjë, për veprat penale “Fshehja e të ardhurave”, “Punësimi i paligjshëm”, “Ndërtimi i paligjshëm” dhe “Shkelja e rregullave të mbrojtjes në punë”.
Së fundmi, materialet i kaluan policisë për veprime të mëtejshme lidhur me zbardhjen e ngjarjes.
