Anëtari i Komisionit të Rithemelimit, Genc Pollo, ka komentuar gjatë një interviste televizive situatën brenda Partisë Demokratike. Pollo deklaroi i bindur se Sali Berisha do të kandidojë për kryetar partie dhe se SHBA, pavarësisht shpalljes së tij si “non- grata” nuk mund t’i mohojë të drejtën e votës së demokratëve. “Ky është përcaktim i SHBA ta marri si vendin, koha do të tregojë se kush ka të drejtë. Se ke zgjedh PD, anëtarët e saj është e drejta e tyre ta vendosin me votë. E gjykojnë vetë se çfarë është me e mira e tyre”, u shpreh Pollo.
Sipas ish-deputetit PD po lë pas periudhën e “errët” që kaloi dhe po mundohet të jetë një opozitë e denjë. “PD po lë pas një periudhë të pakëndshme dhe të padobishme, ajo që I nevojitet Shqipërisë është një opozitë. Nuk duhet të merremi me cic-mice, por duhet një opozitë të mund të kontrollojë, të propozojë politika të reja dhe të flasë për shkeljet”, u shpreh ai.
Sakaq, Pollo cilësoi apelimin e vendimit të gjykatës për ndryshimet e statutit, shërbimin e fundit të kryetarit të Grupit Parlamentar, Enkelejd Alibeajt. Ai shtoi se veprimi i tij tregon se po mohon realitetin, duke mos pranuar se PD e vërtet është me Kuvendin e “Rithemelimit”.
