Pasi SPAK depozitoi kërkesën në Kuvend për heqjen e imunitetit për deputetin e PS, Alqi Bllako, ka reaguar Partia Demokratike duke paralajmëruar kryeministrin Edi Rama të mos pengojë hetimet.
Selia blu shkruan se Bllako është i zhytur “kokë e këmbë”, ndërsa fajësojnë kryeministrin Rama, Veliajn dhe Ahmetajn si përgjegjësit kryesorë për inceneratorët.
“Sot, Spak njoftoi se ka kërkuar heqjen e imunitetit të deputetit socialist Alqi Bllako. Partia Demokratike i kërkon Edi Ramës të mos bllokojë kurrsesi kërkesën e prokurorisë për hetimin e njërës prej aferave më të mëdha të korrupsionit në Shqipëri. Partia Demokratike shton se Alqi Bllako, i zhytur kokë e këmbe në këtë aferë, është vetëm nënfishi i Engjëll Agaçit, Arben Ahmetajt, Erion Veliajt dhe padyshim i Edvin Ramës, përgjegjësia direkte e të cilëve në kuadrin e një grupi te strukturuar kriminal, është tashmë e qartë si drita e diellit”, shprehet PD.
