Letra e ambasadorit amerikan përcjell mesazhin për secilin ligjvënës për të votuar refomën në drejtësi: Nëse udhëheqësit politik nuk e duan konsensusin, ju bëjmë thirrje ta votoni reformën
Amabsadori amerikan, Donald Lu, ka sërish një mesazh për deputetët e Kuvendit të Shqipërisë. Një letër ku shkruhet thirrja drejtuar deputetëve për të votuar reformën në drejtësi, pritet të mbërrijë në tavolinën e secilit prej deputetëve të Kuvendit, në seancën e sotme parlamentare. Burime pranë kuvendit, i thanë 27.al, se letra e ambasadorit ka në thelbin e saj thirrjen drejtuar ligjvënësve për të votuar një reformë në drejtësi e cila do të jetë një reformë për të ardhmen e Shqipërisë.
Në letren e ambasadorit amerikan theksohet ndër të tjera: Është koha për të marrë një vendim, votimi është parashikuar më 21 korrik. Ka ende kohë që udhëheqësit të gjejnë një kompromis që të mbështetet nga opozita dhe mazhoranca. Nëse udhëheqësit politik nuk e duan konsensusin, ju bëjmë thirrje ta votoni reformën. SHBA është një aleat strategjik i Shqipërisë. Ndikimi politik në sistemin tuaj të drejtësisë kërcënon shoqërinë dhe dobëson aleancën tonë. Si aleati NATO-s është në interesin kombëtar të SHBA që Shqipëria të mbetet një demokraci e fortë dhe e sigurtë” shkruan Lu.
Mesazhi i ambasadorit vjen një javë pasi ambasada amerikane solli në sallën e kuvendit, kushtetutën e printuar ku reflektoheshin edhe ndryshimet sipas reformës në drejtësi. Me sa duket, ambasadori amerikan nuk ka ndërmënd të tërhiqet në këtë betejë deri më 21 korrik kur dhe është momenti final i votimit të kësaj reforme në parlament.
