Nesër në 18:00, në “Elbasan Arena”, përballë skuadrës së Starovës do të jetë Slovan e Bratislavës, nënkampionët e Sllovakisë
Kombëtarja e përfundoi misionin e saj në Francë, por futbolli i vendit nuk e ka humbur interesin, kjo edhe për faktin se nuk ka pushime të gjata. Partizani do të jetë skuadra e parë që do të zbresë në fushë, madje që nesër në orën 18:00 në “Elbasan Arena”, ku do të diskutojë turin e parë paraeleminator të Europa League. Përballë nënkampionëve tanë do të jetë Slovan e Bratislavës, që u konsiderua një kundërshtar fare i pafavorshëm, për shkak të diferencës së cilësive midis dy skuadrave. Veç të tjerave, Partizani nuk është më as ekipi i sezonit që përfundoi, pasi lojtarët e larguar nuk janë zëvendësuar. Klubi i kuq ka vendosur të jetë shumë i kujdesshëm në merkato, pasi trajneri që do të zëvendësojë Agostinelin, Sormani, nuk dëshiron të stërvisë futbollistë provizorë, të gatshëm për të luajtur vetëm në përballjet europiane. Përjashtim bën vetëm Torasa, rikthimi i të cilit u bë nëpërmjet kësaj klauzole, pasi Peruxhia që zotëron kartonin e tij kërkon ta huazojë tek Padova për sezonin e ardhshëm. E vetjma blerje me peshë tek Partizani është mbrojtësi Arapi i mbërritur nga Skënderbeu. Sukaj pas tratativave për të gjetur një klub tjetër është kthyer sërish, ndërsa Mazrekaj nuk është as i regjistruar në Europa League, sepse pas dëmtimit të gjatë është kthyer në mbipeshë dhe kërkon trajtim special. Të larguarit janë Fejzullahu, Fazlliu dhe Felipe Gomez, të tre futbollistë shumë të rëndësishëm, ndërkohë që trajneri Sormani ende nuk është zyrtarisht në drejtimin e Partizanit, pasi në fund të këtij muaji përfundon kontratën që e mbante të lidhur me Uatfordin, ku ishte ndihmësi i trajnerit Zola. Skuadrën, të paktën për ndeshjen e parë kualifikuese do ta drejtojë Sulejman Starova.
Slovan e Bratislavës, në listën e 30 futbollistëve të federuar, 11 i ka të huaj, që nga pothuajse i gjithë Ballkani dhe deri në Afrikën e Jugut. Një fat (nëse mund të quhet kështu) për Partizanin është se tre prej futbollistëve të nënkampionëve të Sllovakisë kanë qenë në Euro 2016 dhe pritet të mos aktivizohen në ndeshjen e parë. Këta janë portjeri Jan Musha dhe mbrojtësi Kornel Salata, si dhe sulmuesi hungarez Tamas Priskin, asnjëri prej tyre titular me përfaqësueset.
