Në mbledhjen e djeshme të Grupit Parlamentar të Partisë Demokratike, vëmendja ka qenë tek inceneratorët. Kryetari i Partisë Demokratike, Lulzim Basha, është shprehur se kryeministri Rama u detyrua të fliste për aferën e inceneratorëve edhe në Shtetet e Bashkuara të Amerikës.
“Çështja e inceneratorëve po nxjerr në pah vjedhjen e madhe. Edi Rama u detyrua të fliste edhe në Shtetet e Bashkuara të Amerikës për këtë aferë, sepse ia vunë në tavolinë. Ai kërkon t’u largohet përgjegjësive, duke shitur një e nga një, por në fakt ai është kuzhinieri që ka gatuar këtë byrek dhe ka marrë vetë pjesën më të madhe. Anëtarët e Komisionit të Hetimor të Inceneratorëve kanë bërë një punë të mirë” – është shprehur Basha.
Ai gjithashtu u ka kërkuar deputetëve përkushtim maksimal të komisionit për të nxjerrë në pah aferën. Ai u ka kërkuar që të sigurohen të gjitha kushtet optimale për të pasur vëmendjen maksimale ditën që do të dëshmojë në komisionin hetimor Kryeministri Rama.
“I kanë vendosur para përgjegjësive të gjithë personat që janë thirrur për të dëshmuar. Kjo është një vjedhje e madhe, vjedhja e shekullit, ndaj qytetarët duhet ta mësojnë se ku kanë shkuar 430 milionë euro që kanë dalë nga xhepat e tyre. Ndërkohë duhet të trajtohet me kaq përkushtueshmëri edhe pjesa e mbetur e punës për inceneratorët. Duhet të sigurohet që të jetë e gjithë prezenca e mediave kur të vijë të dëshmojë Edi Rama dhe deputetët, të jenë të përgatitur mirë. Kjo është aferë e madhe që nuk janë të përfshira vetë bashkitë ku janë ndërtuar këto, por edhe të tjera. Edhe kandidatja e PS-së e Durrësit është e përfshirë, sepse ajo i dha 10 milionë euro të ashtuquajturit inceneratorit i Tiranës” – është shprehur kryedemokrati Basha para deputetëve.
