Qëndrimi publik i ish-kryeministrit në ekzil, Bujar Bukoshi në mbrojtje të udhëheqësve të UÇK-së nuk iu dha mbrojtjes si provë shfajësuese. Deklarata e tij mori vëmendjen në seancën ndaj krerëve të UÇK-së që u mbajt në Dhomat e Specializuara të Hagës.
Avokatët e krerëve të UÇK-së pretenduan se njësoj ndodhi edhe me deklaratën e ish-shefit të OSBE-së në Kosovë, Daan Everts, i cili kishte thënë se krimet e pasluftës nuk janë organizuar nga udhëheqësit shqiptarë.
Avokati i licencuar nga Specialja, Taulant Hodaj, vlerëson se prokuroria është e detyruar t’ia dorëzojë provat shfajësuese mbrojtjes, përveç në dy raste specifike.
“Prokuroria e ka një provë ose informacion të cilin e ka marrë në mënyrë konfidenciale dhe e trajton të privilegjuar atë informacion për arsye se dhënësi i informacionit ka bërë marrëveshje me prokurorinë. Në raste të tjera kur prova shfajësuese nuk i shpalosen që të gjitha mbrojtjes janë ato kur cenohet hetimi aktual ose hetim i ardhshëm” – tha Hodaj.
Por, a bëjnë pjesë deklaratat e Bukoshit dhe Everts tek rastet kur provat shfajësuese mund të mos i jepen mbrojtjes.
“Në shikim të parë nuk shihet që ato bëhen pjesë në këto kufizime sepse ato janë prova shumë të përgjithshme dhe nuk shihet që ato mund të cenojnë apo rrezikojnë sigurinë e ndonjë dëshmitari” – vijoi Hodaj.
Seanca e radhës në rastin e krerëve të UÇK-së është caktuar të mbahet më 24 mars.
