Nga Artan Fuga
Pse m’u kujtua sot fare kot se çfarë i thashë në një intervistë gazetarit të Zërit të Amerikës, Ilirjan Agolli, më 25 qershor 2013!
E gjeni edhe në internet të plotë.
Ja :
Zëri i Amerikës: Cilat mendoni se janë sfidat kryesore të shumicës së re dhe qeverisë së re që dalin nga këto zgjedhje?
Artan Fuga: Ka disa sfida: Sfida e parë e shumicës së re në parlament do të jetë qëndrimi që ajo do të mbajë ndaj pushteteve të tjera, për të cilat ka qenë kritike; si ndaj pushtetit gjyqësor, atij presidencial, ndaj kushtetutës dhe shumë reformave që janë bërë. Presim hapat që do të hedhë kjo shumicë. A do të veprojë vetëm kjo shumicë apo do të dialogojë me opozitën? Nga ana e saj, opozita e re është shumë e kufizuar. Këtu do të duket kapaciteti dialogues, koncepti demokratik i palëve dhe do të jemi midis një maxhorance numerikisht shtypëse dhe një opozite që duket se nuk do të ketë asnjë fuqi bllokuese.
Problemi i dytë shumë i rëndësishëm është si do të artikulohet aleanca PS-LSI dhe parti të tjera. A do të konceptohet kjo si një aleancë në legjislativ dhe në qeverisje, po do të mendohet si një parcelizim i ministrive midis partive si ndarja e një torte, si bëri PD-ja. Unë këtë e kam quajtur në botimet e mia si politizim pluralist i shtetit dhe kalim nga shteti juridik dhe nga demokracia e bazuar në ligj tek shteti pluripartiak, që shpesh herë sjell pasoja shumë më tepër se një shtet monopartiak.
Së treti është ekonomia: deri më sot qeverisja e deritanishme ishte e detyruar deri në një farë mase që të mos e shtrëngonte rripin ndaj qytetarit, sepse kishte tetë vjet qeverisje, përgatitej për një sfidë elektorale të vështirë. Ndaj u përpoq që krizën ta zgjidhte me privatizime, duke mbushur buxhetin me privatizime, me anë të borxhit të brendshëm dhe me anë të borxhit të jashtëm. Të gjitha këto kanë arritur në pikën e tyre kulmore. Tani vjen një qeverie re, e cila nuk ka një sfidë elektorale së shpejti, ka katër vjet kohë përpara për të qeverisur. Atëherë, çfarë do të bëjë ajo? Do të ketë vështirësi shumë të mëdha dhe këtu do të duhet një guxim shumë i madh qytetar për të ndërmarrë ato reforma, të cilat nuk mund të mos çojnë në shtrëngimin e rripit ndaj qytetarit. Në të gjithë vendet e zhvilluara reformat e marra janë shoqëruar me shtrëngimin e rripit ndaj qytetarëve. A do të ketë fuqi ta bindi qytetarin? Kjo është sfidë e madhe, që unë uroj ta bëjë dhe të ecë përpara.
