48 të moshuar dhe staf i personelit të shtëpisë së të moshuarve në Shkodër kanë marrë dozën e tretë të vaksinës anti-Covid. Drejtori i kësaj shtëpie, Fatjon Hoxha, thotë se ka pasur interesim të moshuarve për dozën e tretë.
Ai bën me dije se do të mundësohet vaksinimi 100% i të moshuarve dhe stafit të personelit.
Periudha e izolimit ka qenë e vështirë për të moshuarit e kësaj shtëpie, por Hoxha tregon se nuk ka pasur asnjë rast infektimi me Covid, ndërsa vaksina ka dhënë efektin 100%.
“Është bërë traditë te ne që gjatë muajit nëntor të kryejmë vaksinën kundër gripit stinor për të moshuarit.
Që kur ministria e Shëndetësisë nxorri vendimin, ne kemi nisur procesin për vaksinim me dozën e tretë ku bashkë me Drejtorinë e Shërbimit public kemi bërë të mundur injektimin e 48 dozave deri më tani. Të moshuarit po vaksinohen 6 muaj pas dozës së dytë deri në vaksinim 100% dhe të pjesës tjetër.
Kanë qenë shumë të interesuar duke marrë parasysh se te ne vlefshmëria e vaksinës ka qenë absolute dhe nuk kemi asnjë rast infektimi me koronavirus në institucionin tonë“-u shpreh Hoxha.
Ndërkohë, në këtë muaj, të moshuarit do të marrin edhe vaksinën kundër gripit stinor.
