Nga Dom Gjergj Meta
Kronika e zezë e javëve të fundit dëshmon për një situatë të dhunshme që del në pah fuqishëm. Po shikojmë se jemi të rrethuar nga “mina me sahat” njerëzore që, për një shkak ose një tjetër, shikojnë zgjidhjen tek eleminimi fizik i tjetrit.
Krimi ordiner dhe ai i organizuar janë përzjerë keqas. Si njëri, si tjetri janë shfaqje, qoftë e një shoqërie në kaos, e sëmurë dhe e dhunshme e qoftë e një situate institucionale e paaftë për ta parandaluar krimin në kohë.
Mbajtja e armëve kaq e përhapur nuk tregon vetëm thyerjen e një ligji, por edhe shkakun e thyerjes së tij që ka të bëjë thelbësisht me mosbesimin ndaj institucioneve ligjzbatuese.
Nuk ka rrugë tjetër përpos një ndërveprimi midis faktorëve të shoqërisë drejt edukimit me jetën, me ligjin dhe ligjshmërinë, sidomos të brezave të rinj.
Familja, shkolla, policia, sistemi gjyqësor, parlamenti, politika në përgjithësi, religjionet, mediat, nuk mund të jenë vetëm spektatorë indiferentë apo në ndonjë rast përfitues të këtyre situatave. Kërkohet ndërveprim midis tyre.
Kërkohet një vetëdije e shtuar e të gjithëve për vlerën e jetës dhe paqen shoqërore.
