Kreu i Vetëvendosjes, Albin Kurti i është bashkuar fushatës për ndërgjegjësimin e mërgatës shqiptare të Maqedonisë së Veriut për tu bërë pjesë e Censusit 2021.
Më anë të një videomesazhi në facebook, Kurti fton mërgatën shqiptare të Maqedonisë së Veriut të vlerësojnë këtë proces dhe të regjistrohen.
“Për herë të parë mërgata jonë ka mundësi që procesin e regjistrimit ta realizojë nga vendi ku jeton. Të drejtë për tu regjistruar ka secili qytetar me nënshtetësi të Republikës së Maqedonisë së Veriut dhe që është i pajisur me numrin personal, Amëz. Meqë edhe me Kushetutën aktuale të drejtat politike të qytetarëve në Maqedoninë e Veriut diktohen dhe burojnë nga numrat, regjistrimi i çdo qytetari është tejet i rëndësishëm. Shkruani emrin tuaj dhe klikoni mbi opsionin shqiptar. Për të regjistruar të gjithë familjen u merr 10 minuta kohë. Përcaktohet pesha e shqiptarëve në Maqedoninë e Veriut. Çdo familje ka më shumë pjesëtarë në mërgim se në vatër. Ne jemi me vatrën kudo që jemi, as për të qenë më shumë, as për të qenë më pak, por aq sa jemi realisht dhe kjo për ne është shumë.”
Kurti tha se do të vendosë qendrat e VV të mërgatës në shërbim të qytetarëve shqiptarë të Maqedonisë së Veriut për ti asistuar në procesin e regjistrimit në internet.
Procesi për regjistrimin e popullsisë dhe banesave në Maqedoninë e Veriut ka nisur me 3 mars dhe do të mbyllet në 21 prill.
Ky Census vjen 20 vjet pas atij të 2002, ndërkohë që regjistrimi i 2011 u analua për arsye të panjohura nga regjimi i Gruevskit.
