Nga Mero Baze
Për shumë njerëz ka ngjallur kuriozitet përse Knut Flankeshtain, e hapi dhe një herë xhamin e dritares së veturës në oborrin e SHQUP dhe ju drejtua me përgjërim Lulzim Bashës: “Më thuaj të vërtetën”.
Dukej si një lloj makthi që ka krijuar tek perëndimorët fakti që ky njeri i ka gënjyer rregullisht për më shumë se një vit për reformën në drejtësi, dhe befas ka zhvillime të reja negative të orëve të fundit. Ditën kur ndodhi ky episod, ishin konsumuar për herë të parë tre deklarata të qarta, të tre figurave kryesore të opozitës, që po shpreheshin në minutat e fundit kundër reformës në drejtësi.
Sali Berisha deklaroi se reformën do ta miratojë Partia Demokratike kur të vijë në pushtet, pasi kjo shumicë dështoi. Deklarata ishte e qartë, pa ekuiovoke, por nuk përbënte lajm, pasi është qëndrim konstant i Berishës. Po atë ditë, Lulzim Basha për herë të parë ndryshoi qëndrimin e tij në mbështetje të draftit të ofruar nga BE e SHBA dhe tha se “drafti i PD është më i miri dhe më afër Venecias”, duke hedhur poshtë idenë dhe betimin që votonte atë që të ofronte Venecia. Ky ishte zhvillim i ri, pas deri më sot, Lulzim Basha u ka thënë “Po” edhe perëndimorëve për ta miratuar, “Po” edhe Berishës për të mos e miratuar. Por, në minutat e fundit duket se Berisha e ka detyruar të flasë hapur kundër reformës.
Një ditë më pas foli dhe Bujar Nishani. Në një letër ordinere drejtuar Edi Ramës mes të tjerave, ai i bënte thirrje atij të pranonte kompromisin me opozitën, pra versionin e PD për reformën, duke u futur në një linjë me Berishën.
Asnjëherë gjatë këtij viti nuk kanë qenë kaq të bashkuara qëndrimet e tre figurave që përfaqësojnë formalisht PD në këtë proces, Berishës, Bashës e Nishanit.
Ky zhvillim ka alarmuar diplomatët perëndimorë, që po u plas shpirti me reformën, por duket se PD nuk do të lëvizë më nga pozicioni. Zhurmat e njëpasnjëshme që tenton të prodhojë në Kuvend, të cilat konsumojnë njëra-tjetrën, thjesht po kërkojnë t’i japin kohë të mos e fusin në rend të ditës. Dhe gjithë problemi i diplomatëve perëndimorë, sot mbetet Lulzim Basha. Sa më shumë ata përpiqen ta fuqizojnë, aq më shumë ai dorëzon pushtetin e tij, kur vjen puna tek marrja e përgjegjësisë, duke e shpërndarë atë nga Berisha e deri tek Nishani. Për një kohë të gjatë ai i ka vënë ata në gjumë, duke qenë në anën e tyre dhe duke u ankuar në konfidencë për Berishën dhe protagonizmin e tij. Falë kësaj taktike, ata i ofruan atij nenin 25, që amnistonte çdo ish-ministër të Berishës dhe vizitë në grupin parlamentar të dy diplomatëve, përballeshin me Berishën, por Berisha ja dogji të dyja. E detyroi Bashën të distancohej publikisht nga neni 25 dhe ta ndryshonte, dhe refuzoi të shkonte në “takimin me prindër” në grupin parlamentar.
Pas kësaj, duket se Basha është i dorëzuar dhe e vetmja shpresë e tij është të shtyhet ballafaqimi në Kuvend për reformën.
Është kjo arsye që ndërsa dilte nga selia e SHQUP, Knut Flankeshtain hapi dhe një herë derën e xhamit dhe ju drejtua Bashës “Më thuaj të vërtetën”. I ka gënjyer aq shumë, sa ata janë lodhur dhe nuk dinë ç’të bëjnë më me gënjeshtrat e tij. Janë gati ta pranojnë dhe t’u thotë që ju gënjeva dhe të marrin vendimet e tyre. Por, ai do të vazhdojë t’i gënjejë deri në fund, kur ata as vetë nuk do ta kuptojnë pse dreqin u duhej ta besonin kaq gjatë. Ata menduan se përmes reformës po i japin PD-së dhe një kryetar, ndërsa në finale reforma po dështon dhe Basha po humbet çdo shije dhe formale për të qenë kryetar, në një parti ku çdo vendim e merr Berisha. Thjesht u bie që kanë punuar të rikthejnë Berishën në krye të PD.
/gazetatema.net/
