Një ditë pas shoqërimit të 4 aktivistëve nga policia, Aleanca për Mbrojtjen e Teatrit ka paralajmëruar për protestë.
Aleanca për Mbrojtjen e Teatrit deklaron se 4 aktivistët Astrit Seranaj, Donald Martini, Gentian Hasani, dhe Ergys Mërtiri janë ndaluar dhunshëm nga policia dhe se brenda ambienteve të komisariatit dhuna është përshkallëzuar. Ata akuzojnë policinë se janë përpjekur të zhdukin provat nga celulari i Ergys Mërtirit dhe se kanë dhunuar me grushte dhe shkelma Astrit Seranajn dhe Donald Martinin.
Aleanca shtron tre kërkesa, marrjen e masave nga Policia e Shtetit ndaj efektivëve që ushtruan dhunën pa motiv, shkarkimin dhe procedimin penal të tyre; shkarkimin dhe procedimin penal të Drejtorit të Përgjithshëm të Policisë së Shtetit Z.Ardi Veliu; Ristrukturimin e Policisë së Shtetit që ajo t’i rikthehet qytetarëve.
Për këto kërkesa ata paralajmërojnë protestës sot në orën 18.00 në sheshin para Ministrisë së Brendshme.
