Kreu i PD, Lulzim Basha në takim me disa mjekë të familjes
Një prej mjekëve të familjes në takim me kryetarin e PD-së, Lulzim Basha ngriti alarmin për një grup njerëzish që sipas tij refuzojnë të bëjnë tamponin për koronavirusin.
Mjeku tha se ky grup i konsiderueshëm njerëzish nuk pranojnë as të shkojnë në spital, edhe pse janë të sëmurë.
“Të mos flasim që ekziston edhe një grup tjetër që as nuk pranojnë të bëjnë tamponin dhe as nuk duan të shkojnë në spital, edhe pse janë të sëmurë”.
Kur Basha i pyeti mjekët se përse disa pacientë nuk pranojnë të shkojnë në spital, një prej tyre tha: “Ndoshta se është hapur ideja që po shkove në spital do vdesësh. Qofsha i gabuar”.
Mjeku shprehu shqetësimin se pacientët që janë nën monitorimin e tyre, e marrin përgjigjen personalisht, ndërsa ISHP nuk e njofton edhe mjekun e familjes për përgjigjen. Për këtë arsye tha ai “ekziston mundësia që pacienti të gënjejë për përgjigjen, ose të thotë të vërtetën”.
