Mesila Doda: Shqiptarët kudo që janë duhet të jenë bashkë në një shtet të fortë që quhet Shqipëri
Kryetari i PDIU-së, Shpëtim idrizi nuk heziton të ritheksojë idenë e bashkimit të shqiptarëve, dhe për këtë i referohet Kushtetutës së Shqipërisë, në të cilën theksohet qartë sipas tij, aspirata për bashkimin kombëtar të shqiptarëve. Në takimin përmbyllës të fushatës së anëtarësimeve të reja, në Pogradec, Idrizi theksoi se shqiptarët nuk duhet të kthehen në tifozë të politikës, por të anëtarësohen në PDIU për ta ndryshuar politikën
“Ne e kemi detyrim kushtetues, i ftoj të gjithë politikanët që të lexojnë preambulën e Kushtetutës së Shqipërisë, ku flitet që ne e kemi aspiratë bashkimin dhe identitetin kombëtar dhe kjo është PDIU. Ju jam shumë mirënjohës për praninë tuaj këtu, për zërin tuaj, i cili do të bashkohet me forcën e PDIU-së. Ne jemi të bindur miqtë e mi, se vetëm duke qenë bashkë do të jemi një parti më e fuqishme, një zë më i fuqishëm. Kur them që ftoj politikanët shqiptarë të lexojnë preambulën e Kushtetutës, kam parasysh faktin, që ne nuk u nisëm nga një padrejtësi familjare, personale, por ne kthyem kokën pas për amanetin e të parëve. E mbajtëm kokën lart si shqiptarë të Çamërisë dhe si shqiptarë, të cilët e duam Shqipërinë, jo me njerëz të dobët, të varfër, të përçarë, të ndarë ashtu si na do politika shqiptare e të dy krahëve. Ne e duam në radhë të parë shqiptarin me dinjitet dhe dinjiteti vjen duke qenë të qartë për identitetin kombëtar, duke qenë të qartë dhe krenarë se ne jemi shqiptarë që kemi dhënë shumë, jo vetëm këtij vendi, por i kemi dhënë shumë edhe historisë së kombeve më të zhvilluara”, tha Shpëtim Idrizi.
Kryetari i PDIU-së i bëri ftesë shqiptarëve të anëtarësohen në PDIU, në mënyrë që të ndryshojnë politikën, pasi sipas tij politikanët kërkojnë ti mpijnë me një opium, që në Parlament të mos diskutohet për hallet e problemet e qytetarëve.
“Keni parë politikën për 25 vjet. Miqtë e mi shihni çdo të enjte Kuvendin e Shqipërisë, me të cilin edhe ne që jemi aty shumë herë na vjen turp, që bëhemi pjesë e saj. Shihni politikën, se si në atë Parlament flitet për gjithçka, por vetëm për ligje, vetëm për ekonominë, vetëm për prosperitetin e shqiptarëve, vetëm për një zhvillim ekonomik të qëndrueshëm nuk flitet. Pse? Sepse ata duan t’ju japin ju, t’ju mpijnë me një opium njerëzor, që ju të mos kuptoni dhe të ktheheni thjesht dhe vetëm në tifoz. Jo! Ne jemi qytetarë të dorës së parë, ne duam qeverisje të mirë, ne duam Parlament që të falsë për hallet dhe problemet dhe t’i japë zgjidhje shqiptarëve. E si do ta arrijmë ne miqtë e mi këtë gjë, duke bërë sehir ata njerëz që fatkeqësisht nuk janë ata që duhet t’ju përfaqësojnë juve, duke mbetur jashtë politikës, duke e konsumuar atë darkë për darkë, apo nëpër klube? Jo miqtë e mi! Unë ju ftoj të vini në PDIU, të futeni brenda poltikës shqiptare e ta ndryshojmë bashkë atë. Kjo është arsyeja pse ne jemi këtu, kjo është arsyeja pse ne përditë shkojmë dhe kontaktojmë në të gjithë trevat dhe qytetet e Shqipërisë. PDIU është nisur me zemër, por ne sot jemi nisur për t’u bërë një parti e madhe e të gjithë shqiptarëve, nga Tropoja, nga Lezha, nga Dibra, nga Tirana, nga Vlora, nga Pogradeci, nga Korça, kudo ku ka dhe rreh zemër shqiptari. E unë jam i bindur që edhe këtu në Pogradec ka djem e vajza patriotë, ka djem që e duan Pogradecin dhe gjithë Shqipërinë. Prandaj, unë ju ftoj të vini në PDIU, për bashkimin kombëtar të shqiptarëve, për të gjithë shqiptarët bashkë, për integrim europian që do të fillojë nga integrimi i shqiptarëve”, u shpreh Shpëtim Idrizi.
Kurse deputetja Mesila Doda tha se shqiptarët kudo që janë duhet të jenë bashkë në një shtet të fortë që quhet Shqipëri.
“Para disa kohësh pashë një shkrim të Albin Kurtit që thoshte jo dy shtete shqiptare, jo dy shtete të dobëta, jo politikanë të fortë, por një shtet i vetëm, një Shqipëri e vetme, e cila duhet të jetë e fortë dhe do duhet të jetë shteti i shqiptarëve. Kam shumë dallime me Albin Kurtin, nuk e mendoj njësoj si ai për politikën e jashtme, për politkën e brendshme, ekonominë, por di të them që me zemër të gjithë ne shqiptarët duhet të jemi të fortë, duhet të jemi bashkë në një shtet të fortë, në një shtet amëtar, që duhet të quhet Shqipëri. Dhe kjo është shtylla kryesore e PDIU-së. Ne do punojmë për të pasur mundësi të kemi një shtet të fortë shqiptar dhe politikanë të dobët. Nëse politikanët pushtetmbajtës mendojmë që do fuqizojnë pozitat e tyre duke i lënë shqiptarët të ndarë, të dobët, të pazhvilluar, në pak progres kështu siç janë sot, e kanë shumë gabim. PDIU është partia e cila në programin e saj ka mbi të gjitha bashkimin kombëtar, bashkimin e shqiptarëve si rrugën tonë të vetme të zhvillimit”, u shpreh Mesila Doda.
Deputeti Aqif Rakipi tha: “Në zgjedhjet e ardhshme do t’i kemi të gjitha strukturat të ngritura, për arsye që të kemi sa më shumë deputetë dhe që mund t’ju ndihmojnë të gjithë juve, për hallet dhe promblemet që keni. Bashkohuni me ne, që të bëhemi faktor në politikën shqiptare.”
Ndërsa deputeti Tahir Muhedini u shpreh: “Ne jemi forca e katërt politike në Parlamentin Shqiptar, por pretendimet tona janë shumë më të mëdha. Ne këtu në Qarkun e Korçës, me punën tuaj duhet të nxjerrim deputetin nga PDIU. Duhet të kemi një gjë të qartë, që programi i forcës tonë politike është program për shqiptarët kudo që janë. Ftoj të gjithë të rinjtë dhe qytetarët e Pogradecit të bashkohen me PDIU-në”.
Arbër Kulla, kryetari i PDIU për Pogradecin theksoi: “Ne të rinjtë me vlerat që përfaqësojmë duhet të bëhemi pjesë e PDIU-së. Çështjet e PDIU-së janë kuazat që aspiron çdo i ri. Ju bëj thirrje të gjithë të rinjve t’i bashkohen PDIU-së, nëse doni që zëri juaj të dëgjohet. Nëse jeni të zhgënjyer nga partitë e mëdha dhe ndjeheni të pavlerësuar, bashkohuni me ne.”
Në këtë mënyrë të gjithë anëtarët e PDIU-së do t’i drejtohen kutive të votimit në datën 21 maj, për të zgjedhur strukturat në çdo qytet e fshat, si dhe për të zgjedhur kryetarin e partisë me parimin një anëtar, një votë. Në zgjedhjet e 21 majit do të jenë dy kandidatë për kryetarë të PDIU-së. Shpëtim Idrizi, kryetari aktual dhe Halil Hyseni që mban postin e zëvendësministrit të Jashtëm. Përpara se të shkojnë në votim, ditën e shtunë, ata do t’i prezantohen publikut me platformat e tyre, në një dëgjesë publike e cila do të mbahet në datën 19 maj.
