Emiliano Vila shënon në minutën e fundit të transfertës së Korçës dhe tashmë i ka të gjitha mundësitë për të luftuar deri në minutën e fundit për titullin e madh
Ishte e 90’, kur pas një harkimi të Kalarit, Bardhi nuk arriti tek topi, ndërsa Vila me një veprim akrobatik e dërgon të rrjetë. Partizani tani është vetëm dy pikë pas Skënderbeut në tabelën e kalsifikimit dhe tashmë ka shanse reale për ta fituar titullin kampion. Kjo ishte vërtetë një ndeshje kartolinë, ndoshta jo nga cilësia, por nga dashuria e atyre që ishin në fushë. Në pjesën e parë rastet ishin me pikatore, një goditje spektakolare e Lilajt dhe po e tillë ishte edhe përgjigjia e Alban Hoxhës. Ndërsa në fund të periodës ishte Fejzullahu që bën një veprim për katalog, por për punë centimetrash nuk e gjen dot kuadratin. Ndërsa një minutë pas fillimit të pjesës së dytë, Emiliano Vila godet dhe topi përplaset tek të dy shtyllat e Shehit. Kjo duhet të ishte dita e Partizanit, pavarësisht se edhe korçarët nuk ndenjën indiferent, pasi në të 75’, Nimaga, por edhe Lilaj, i kishin të gjitha mundësitë për të vendosur titullin që në shtëpi.
Më pas vjen minuta e fundit në kronometrin e Kridens Metës, goli i Vilës dhe skuadra e Agostinelit duhet të mendojë vetëm për 90 minutëshin me Teutën një javë më pas, ndërsa tifozët duhet ta kenë mendjen edhe në Vlorë, ku do të jetë Skënderbeu që do të diskutojë ndeshjen e fundit. Ndërkohë që ndeshja u monitorua nga 320 policë lokalë dhe 120 forca të FNSH-së. Rreth 5-6 orë përpara fillimit të takimit, është raportuar që tifozët e Partizanit kanë qenë protagonist në disa ngjarje të dhunshme në Korçë, por më pas nuk është shënuar asnjë incident i rëndë.
