Kryeministri Edi Rama ka hedhur poshtë kontributin e, SHBA-BE-OSBE, për krijimin e Këshillit Politik dhe marrëveshjen që u arrit në 5 qershor.
Sipas tij, ky Këshill është krijuar, vetëm se ashtu donte Partia Socialiste. Në kuadër të kësaj ai është deklaruar i prerë se për ndryshimet kushtetuese, nuk vendosin ndërkombëtarët dhe ato do të votohen 30 korrik pa asnjë diskutim.
“PS-ja nuk detyrohet nga askush, veç njerëzve që përfaqëson. Dëgjova që Këshillin Politik e paska krijuar një aleancë globale SHBA-BE-OSBE. Nuk është e vërtetë. E ka krijuar vullneti ynë, i PS-së, që është shumicë.
PD-ja që kërkon të qeverisë ende nuk di të flasë shqip. Kjo ka qenë një gjë që i kam kërkuar Bashës në 2017, jo më anglisht, është turp i botës, nuk na respektojnë miqtë dhe partnered, nëse u japim bujarisht detyra që janë tonat.
Ne nuk jemi shërbëtorë të askujt, jemi të ndërgjegjshëm se nuk jemi as SHBA, BE, as superfuqi bërthamore, por një vend i vogël, falë edhe miqve dhe partnerëve tanë. Por, vjen puna do të hapim apo jo listat, këtë e vendosim ne, se pastaj do të ishte fundi.
Këtë e vendosim ne! Dhe nuk kemi asnjë problem që ta diskutojmë dhe t’ua themi, sikur ua kemi thënë dhe besoj do të vazhdojmë ta themi, kur të jetë e nevojshme, por nuk besoj se do të jetë e nevojshme për një kohë të gjatë.
Ky kuvend do të hapë listat në 30 korrik, kjo është marrëveshja!”-, deklaroi Rama.
Por, pavarësisht nga kjo retorikë ai “harroi” se ndryshimet në Kodin Zgjedhor nëpërmjet një konsensusi mbarë-politik, janë një kusht i Bashkimit Europian për ecjen përpara në hapjen e negociatave dhe jo një vullnet i PS, siç u shpreh ai.
Gjithashtu, kujtojmë se takimet deçizive të Këshillit Politik me gjithë nënshkrimin e Marrëveshjes së 5 qershorit u kryen në rezidencën e ambasadores amerikane.
/syri.net/
