Drejtoria e Policisë Rrugore ka bërë një apel për qytetarët, tashmë me ardhjen e verës dhe frekuentimit në masë të plazheve.
Në një deklaratë të lëshuar për mediat dhe qytetarët, policia teksa thekson masat e forta që ka marrë me ardhjen e sezonit turistik, i kërkon drejtuesve të mjeteve që të bëjnë kujdes, duke mos drejtuar automjetin në gjendje të dehur apo pa rrip sigurimi, si dhe të evitojnë parakalimet e gabuara, shpeshherë të panevojshme. Përdorimi i celularit është gjithashtu i ndaluar.
Mirëpo, një thirrje tjetër e Policisë përsa i përket orarit apo itinerarit të lëvizjes ka ngatërruar qytetarët.
“Policia Rrugore këshillon drejtuesit e automjeteve që mos të nisen të gjithë në të njëjtin orar nga plazhet drejt banesave të tyre, si dhe të përdorin edhe rrugët alternative, me qëllim shmangien e krijimit të fluksit të pandërprerë në rrugë nacionale, në hyrje apo dalje të qyteteve”, thuhet në deklaratë.
Përsa i përket orarit të nisjes, si mund të komunikojnë qytetarët me bashkëpushuesit e tyre dhe si mund të bien dakord që të mos nisen të gjithë në të njejtin orar?
Ekziston tendenca që të gjithë të nisen herët që të shmangin trafikun, mirëpo duke menduar të gjithë kështu, krijohet trafik më i madh. Nëse pushuesit lexojnë këtë deklaratë të policisë, nuk do nisen herët, por do nisen pak më vonë, atëherë përsëri qëllojnë bashkë në të njejtin orar.
Nuk mund të këshillohet turma me një deklaratë e cila është e përgjithshme, ndërkohë që pushuesit janë specifikë dhe të ndarë. Njerëzit do nisen nga banesa për në plazh apo anasjelltas kur ta mendojnë ata më të arsyeshme, kur të jenë gati për t’u nisur, e nuk mund t’ju thuhet që “mos u nisni të gjithë në një orar”. Cili është orari atëherë?
Së dyti, përsa i përket përdorimit të rrugës alternative. Nëse më parë të gjithë mendonin të lëviznin nga rruga kryesore, tani me ketë deklaratë të policisë, ata që e kanë lexuar do përdorin rrugën alternative. Po sikur këtë deklaratë të policisë ta lexojnë të gjithë pushuesit dhe të gjithë të qarkullojnë në rrugë alternative? Sërish do të ketë bllokim.
Prandaj as kjo thirrje nuk vlen, pasi shoferi e gjykon aty për aty nga cila rrugë do kalojë, nga kryesorja apo alternativja, dhe nuk bën plane para se të niset. Psikologjia e shoferit është më e komplikuar se sa një këshillë, “nisu në këtë orar” apo “qarkullo në këtë rrugë”.
Policia duhet të përgatitet për një trafik të rënduar dhe të bëjë çmos ta zhbllokojë atë, me mjete alternative, këshillat janë pak të vlefshme në sezon vere, kjo është vërtetuar vit pas viti.
Drejtoria e Policisë Rrugore
550 punonjës të Policisë Rrugore, radarë, kamera, alkoolteste, automjete të uniformuara dhe motoçikleta, për menaxhimin e trafikut rrugor në sezonin e verës dhe parandalimin e aksidenteve rrugore.
Në kuadër të masave të marra nga ana e Policisë së Shtetit për garantimin e rendit dhe sigurisë gjatë sezonit turistik veror 2020, Drejtoria e Policisë Rrugore ka rritur prezencën e saj në akset rrugore nacionale dhe në zonat bregdetare, për shkak të rritjes së ndjeshme të qarkullimit rrugor.
Në të gjitha akset rrugore nacionale dhe ato që lidhin zonat bregdetare, Policia Rrugore, që prej një jave është duke kryer shërbime me orë të shtuara, me qëllim përballimin e fluksit të madh të automjeteve që qarkullojnë në zonat bregdetare gjatë sezonit veror.
Ditën e shtunë dhe të diel, drejtues mjetesh, pasagjerë, drejtues motomjetesh, përdorues të shumtë të rrugës të të gjitha moshave, vendas dhe turistë të huaj udhëtojnë drejt plazheve të vendit tonë.
Policia Rrugore informon se do të jetë prezente në akset rrugore për të mbikëqyrur trafikun, për të parandaluar shkeljet dhe aksidentet, për të ndihmuar në çdo rast bllokimi të trafikut dhe për të dhënë ndihmë automobilistike ndaj kujtdo që ka nevojë.
“Ndihma” që Policia Rrugore kërkon nga të gjithë drejtuesit e mjeteve është respektimi i normave të sjelljes.
- Mos drejtoni automjetet nën ndikimin e alkoolit apo më keq akoma, në gjendje të dehur!
- Vendosni përherë rripin e sigurimit dhe kaskën mbrojtëse kur drejtoni mjete/motomjete.
- Evitoni parakalimet e gabuara, pasi janë rreziku më potencial për aksident rrugor dhe për bllokim të trafikut.
- Mos përdorni celularin gjatë drejtimit të mjetit.
- Qëndroni në radhën e mjeteve kur ajo krijohet për shkak të ngarkesës së madhe. Dalja nga “kolona” mund t’ju kushtojë një gjobë së bashku me pezullim të lejes së drejtimit 2-4muaj.
- Duke respektuar normat, vajtja dhe ardhja nga plazhet është më e shkurtër dhe pa vonesa.
Policia Rrugore këshillon drejtuesit e automjeteve që mos të nisen të gjithë në të njëjtin orar nga plazhet drejt banesave të tyre, si dhe të përdorin edhe rrugët alternative, me qëllim shmangien e krijimit të fluksit të pandërprerë në rrugë nacionale, në hyrje apo dalje të qyteteve.
Njëkohësisht apelojmë për këmbësorët të respektojë me korrektësi rregullat e qarkullimit, të kalojnë në vijat e bardha dhe mbikalimet dhe aty ku ato mungojnë të kontrollojnë rrugën nga të dy senset e lëvizjes pastaj të kalojnë në krahun tjetër të rrugës.
Gjithashtu, Policia Rrugore bën me dije se në zbatim të Udhëzimit të Përbashkët të Ministrit të Punëve të Brendshme dhe Ministres së Transportit dhe Infrastrukturës “Mbi kufizimet në qarkullimin e mjeteve të rënda për transportin rrugor të mallrave”, nuk do të lejojë lëvizjen e kamionëve në fundjavë jashtë orareve dhe akseve të përcaktuara në këtë udhëzim.
Personat fizikë dhe juridikë që operojnë në fushën e transportit rrugor të mallrave, të planifikojnë lëvizjet e tyre në ditët dhe oraret e lejuara, në akset rrugore alternative që nuk preken nga kufizimet, pasi nga ndërprerjet e qarkullimit mund t’u shkaktohen edhe dëmtime të materialeve që transportojnë, përgjegjësi që bie plotësisht mbi ta. Nga shërbimet e Policisë së Shtetit do të kërkohet zbatimi rigoroz i kërkesave të këtij udhëzimi, duke i ndëshkuar shkelësit e kërkesave të udhëzimit, si dhe ndalimi i qarkullimit të mjeteve në kundërvajtje deri në oraret e lejuara për qarkullim.
Policia Rrugore, në bashkëpunim me radiot kombëtare me sinjal të shtrirë në vend, do të vijojë njoftimet për zonat me trafik të rënduar apo nevojën për devijime në qarkullim.
Në faqen zyrtare në ëeb dhe në rrjetet sociale të Policisë së Shtetit dhe Ministrisë se Brendshme do të publikohen të dhëna të përditësuara për situatën në trafik.
Policia Rrugore fton qytetarët dhe mediat që të denoncojnë çdo rast të abuzimit me detyrën nga ana e punonjësve të saj, si dhe të denoncojnë çdo shkelje të Kodit Rrugor, duke iu garantuar reagim të shpejtë e të paanshëm.
