Zv. ministri i Brendshëm Besfort Lamallari, tashmë i deleguar si prefekt në Shkodër e cila është ndër zonat më problematike sa i përket Covid-19, sot ka marrë vendimin e parë sa i përket përballimit të situatës së krijuar prej pandemisë.
Bëhet me dije se Lamallari ka vendosur që tregu i Zdrales të qëndrojë i mbyllur deri më 23 qershor 2020.
Sakaq ai ka kërkuar që tregu i shitjes me shumicë në Dobraç të marrë masa higjeno-sanitare. Në Dobraç sipas vendimit duhet të ruhet distanca dhe të vendoset sinjalistika.
Kujtojmë se Shkodra deri më tani raporton 103 raste me Covid dhe është cilësuar si “mina me sahat” pasi renditet e dyta për nurmin e të prekurve pas Tiranës.
Vendimi:
Vendim nr.04 datë 24.04.2020 i Komisionit të Mbrojtjes Civile, Qarku Shkodër.
– Në kuadër të zgjatjes së gjendjes së fatkeqësisë natyrore me VKM Nr.312, datë 18.4.2020 për propozimin Kuvendit të Republikës së Shqipërisë për dhënien e pëlqimit për zgjatjen e gjendjes së fatkeqësisë natyrore, të shpallur me vendimin nr.243, datë 24.3.2020, të Këshillit të Ministrave “Për Shpalljen e Gjendjes se Fatkeqësisë Natyrore”, veprimtaria tregtare në Tregun Zdrale do të vazhdojë të jetë e pezulluar deri në datën 23.6.2020, për tregtarët e produkteve bujqësore.
– Prioritet gjetja dhe vënia në funksionim i një tregu alternativ, sipas standardeve të nevojshme.
- Tregu i shitjes me shumicë Fruta Perime, Dobraç të marrë masa për rritjen e parametrave higjeno-sanitare (dezinfektimi, sinjalistika, distanca e nevojshme).
