Kreu i Partisë Demokratike, Lulzim Basha ka reaguar ndaj kryeministrit, Edi Rama për çështjen e maskave që janë shpërndarë nga Ministria e Shëndetësisë dhe Mbrojtjes Sociale maska të skaduara prej më shumë se 9 vitesh.
Rama pranoi që maskat të jenë të skaduara gjatë mbledhjes së sotme të qeverisë, ndërsa Basha duke e etiketuar kryeministrin në rrjetet sociale, shkruan se në vend të sulmojë opozitën, të japë llogari rreth këtij skandali.
“Në vend që të sulmojë opozitën @ediramaal duhet të japë llogari pse ka shpërndarë 1.2 milionë maska të skaduara? Gënjeshtrat dhe sulmet kundër opozitës nuk i shërbejnë as sigurisë dhe as jetës së shqiptarëve! Janë mijëra burra, gra dhe femijë që duhen mbrojtur”, shkruan Basha në Twitter.
Në një status të dytë brenda pak minutash, kreu i opozitës shprehet se duhet të ndalojë fshehja e dështimit me justifikime dhe gënjeshtra.
“Boll me justifikime që fshehin dështimin, boll me gënjeshtra që fshehin paaftësinë, bëj detyrën dhe merr masa reale kundër epidemisë, për hir të gjithë shqiptarëve”, shkruan Basha.
