Zarzavatet, sallatat dhe frutat janë burimi më i mirë i vitaminave dhe mineraleve. Rekomandimet për marrjen e vitaminave dhe mineraleve shtesë ose multivitaminave janë zakonisht të panevojshme nëse konsumohen këto perime e fruta.
Vitamina A
Vitamina A është e nevojshme për funksionimin normal të syrit (veçanërisht për të parin në errësirë), mbron lëkurën nga tharja dhe ndihmon në zhvillimin e kockave. Në ushqime vitamina A është në dy forma: Retinoli dhe Karoteni. Retinoli është i pranishëm vetëm në ushqimet me origjinë shtazore. Ai është i tretshëm në yndyra. Mëlçitë, peshku, veza e qumështit me yndyrë janë të pasura me retinol. Karoteni gjendet kryesisht në ushqimet me origjinë bimore. Karotenet janë përzierje të një substance ngjyrë të verdhë-portokalli, që kthehet në organizëm në vitaminë A. Më të rëndësishme nga këto janë beta karotenet. Burimet e nevojshme të karoteneve janë zarzavatet me gjethe jeshile ose të verdha. Vitamina A është e qëndrueshme gjatë gatimit dhe nuk shkrihet në ujë. Vitamina A gjendet në qumështin e gjirit, mëlçi, të verdhën e vezës, fruta me ngjyrë portokalli (por jo në portokallet), mango, fruta ekzotike (sa më e errët ngjyra aq më shumë vitaminë A ka në to), perime me gjethe jeshile: spinaqi, brokoli, kungulli.
Vitaminat e grupit B
Ndër vitaminat e grupit B, më të rëndësishme janë vitamina B ose vitamina B1, fiboflavina, vitamina B2, niacina. Këto janë vitamina të tretshme në ujë. Funksionet kryesore të tyre janë kryesisht në zbërthimin e karbohidrateve gjatë prodhimit të energjisë dhe në rregullimin e përdorimit të proteinave nga trupi. Burime ushqimore më të pasura me tiaminë, roboflavinë dhe niacinë janë mishi, peshku, vezët, qumështi, bishtajoret, arrat, drithërat.
Vitamina B 12 dhe acidi folik
Këto vitamina janë të rëndësishme për proceset e formimit të gjakut. Acidi folik dhe vitamina B 12 gjenden në zarzavatet jeshile. Ato janë pak rezistente karshi nxehtësisë dhe janë të tretshme në ujë. Pamjaftueshmëria e vitaminës B 12 shkakton aneminë (lekopeni, trombocitopeni, neuropati).
Vitamina C
Vitamina C është e nevojshme për shumë procese në organizëm, rigjenerimin e indeve të dëmtuara, rigjenerimin e plagëve, lidhjen e kalciumit në kocka, ndërtimin e mureve të kapilarëve të gjakut dhe ruajtjen e elasticitetit të tyre. Vitamina C ndihmon në thithjen e hekurit me ushqime, sot përmendet dhe roli i saj në mbrojtjen nga infeksionet. Burimi më i mirë i vitaminës C për latantin e vogël është qumështi i nënës. Ai është i pasur me vitaminë C, tre herë më shumë se qumështet e tjera. Vitamina C gjendet në frutat dhe zarzavatet, veçanërisht në frutat e freskëta si: portokalle, mandarina, pjepër, banane, pjeshkë, domate dhe speca. Në perime gjendet në ato me gjethe jeshile si: spinaqi, lakra, lulelakra dhe brokoli.
Vitamina D
Rrezet e diellit janë burimi kryesor për vitaminën D, qoftë edhe për 1-15 minuta marrje e rrezeve të diellit në krahë apo fytyrë rreth 3 herë në javë është mundësisht e mjaftueshme për të prodhuar mjaftueshëm vitaminë D për të arritur shumicën e nevojave. Duhet nxitur ecja për të kombinuar efektin që ka aktiviteti fizik për kockat, me marrjen e vitaminës D nëpërmjet rrezeve të diellit. Kjo vitaminë është e nevojshme për të parandaluar rakitin te fëmijët. Ajo gjendet në disa ushqime dhe në një substancë kimike të lëkurës së njeriut, e cila shndërrohet nën veprimin e dritës së diellit në vitaminë D dhe pastaj thithet nga organizmi. Vitamina D është e tretshme në yndyrë. Kohët e fundit në qumështin e nënës është gjetur dhe një tjetër formë e vitaminës D e tretshme në ujë. Prania e vitaminës D në organizëm ndihmon depozitimin e kalciumit në kocka dhe dhëmbë. Ajo ndihmon për të kontrolluar nivelin e kalciumit në gjak, kalciumi i absorbuar eliminohet nëpërmjet veshkave. Vitamina D gjendet në qumësht, gjalpë, djathtë e vezë. Vaji i peshkut është mjaft i pasur me vitaminë D. Për fëmijën, mënyra më e mirë për marrjen e saj është nga rrezet e diellit në lëkurë dhe nga qumështi i gjirit të nënës. Qumështi i nënës ka rreth 20-200 UI vitaminë D për 1 litër. Në rast se nëna ushqehet mirë, pamjaftueshmëria e vitaminës D është e rrallë, sidomos gjatë 4-6 muajve të parë, por megjithatë shumë autorë rekomandojnë dhënien e vitaminës D me pika në këto fëmijë.
Vitamina E
Vitamina E është e tretshme në yndyra, ajo merr pjesë në procesin e rigjenerimit të qelizave.
