Turqia ka hapur kufijtë për 72 orë, me Greqinë dhe Bullgarinë duke lejuar dhjetra mijëra refugjatë nga Siria që të mësyjnë dyert e Bashkimit Europian.
Vendimi u mor mbrëmë nga qeveria turke si një kundërpërgjigje ndaj Perëndimit, i cili nuk po e ndihmon në krizën siriane, ndërkohë që në Turqi aktualisht gjenden 4 milion refugjatë nga Siria duke shkaktuar një tension të madh social.
Ky vendim erdhi pasi një numër i madh ushtarësh turq u vranë mbrëmë pas një sulmi ajror në Siri. Deri më tani shifra zyrtare është 33 të vrarë, ndërsa nga raportime të ndryshme të mediave ndërkombëtare bëhet fjalë për rreth 60-70 të tillë.
Pas vendimit, mijëra sirianë kanë mësyrë ishujt grekë duke lundruar me gomone dhe mjete të tjera. Ushtria greke është vënë në alarm duke mbyllur kufirin për të mos lejuar futjen e refugjatëve në territorin e tyre.
