Gazetari Ylli Rakipi, komentoi paketën “Anti Shpifje” dhe përpjekjet e kryeministrit Rama, për të goditur dhe kontrolluar median në vend.
Në një lidhje direkte me gazetaren Beti Njuma në Ora News, Rakipi kërkoi që lufta e gazetarëve të shkojë deri në fund, por jo përmes bojkotit.
Ndër të tjera, ai sulmoi edhe Lulzim Bashën, sepse sipas gazetarit premtimet e tij publike mbi anulimin e këtij ligji, kur të marrë qeverisjen, janë boshe dhe pa vlerë, sepse Shqipëria është kthyer në dikaturë, vetëm me një lidet, Edi Ramën.
Biseda e plotë
Rakipi: Edi Rama duhet të kuptojë një gjë shumë të thjeshtë, Lulzim Bashën ai e zbrapsi në verë edhe me ndonjë politikan të dorës së tretë për shkak të stabilitetit të Shqipërisë. Por media, do t’i mbetet në fyt, është vijë e kuqe. Edi Rama është çmendur dhe nuk e kupton, që ka kundër gjithë bashkësitë kombëtare, gjithë organizatat për të drejtat e njeriut…Nëse nuk i kupton të gjitha këto, këtu fillon fundi i shpejtë i Edi ramës.
Njuma: Tani po të marrim parasysh edhe ato deklaratat e opozitës, gjatë këtij viti janë shkelur shumë vija të kuqë dhe kjo me median do të jetë një më shumë në listën që akuzon opozita
Rakipi: Jo, jo Beti. Nuk janë kaluar shumë vija të kuqe.
Njuma: Po zgjedhjet me një parti, vija të kuqe janë.
Rakipi: Nëqoftëse një diplomat perëndimor i rangut të fundit, të jep ty dy deklarata, dy intervista as deklarata kështu të forumit të vet, të institucionit të vet, dhe ti zbythesh në mënyrë qesharake, do të thotë që ti ke ikur vetë nga proçesi, ke dalë nga ai proçes dhe këtu u mësua Edi Rama. Këtu kuptoi Edi Rama që mund të bëntë çfarë të dontë, këtu kuptoi Edi Rama që mund t’i pushtonte të gjitha…
Ky është problemi, ndaj edhe unë u acarova në minutat e para, Lulzim Basha sigurisht që është me ne, është në frontin tonë, është në frontin e medias, por ai duhet t’i bashkohet proçesit. Nuk ka më teatër dhe të thuash kur të vij unë në pushtet, kur, kur është nesër?
Kur është nesër? Me një diktator nuk ka nesër. Kur vendi është zhytur në këtë rregjim, nuk ka nesër. Këtë duhet të kuptojë Lulzim Basha, Monika Kryemadhi që del nëpër studio televizive, dhe nëse nuk e kupton këtë duhet të kuptojë presidenti Meta, i cili po ndeshet me Dvoranin jo me diktatorin. Këtu jemi.
Njuma: Problem mbetet jo vetëm mënyra e komunikimit të Ramës me mediat, etiketimi që na bën në gazetarëve, lajmet e gatshme, mbyllja e dyerve tek aktivitetet kryeministrore, refuzimi për të ardhur në emisione, sidomos kur mediat nuk janë në një linjë me qeverinë, apo edhe mbyllja e emisioneve si në rastin tuaj apo të Krastës. Çfarë duhet të bëjmë?
Rakipi: Po e mbylli moj e mbylli se ishin hallexhinj ata ku punoja unë . Mund të të ndodhë edhe ty ketu ku je. Po i mbylli moj i mbylli, ai vetëm të mbyllë di, nuk di të punojë asnjë gjë.
Njuma: ‘Shqipëria gojë të mbyllura’ thoshte një emision i Rai 3 disa ditë më parë. Gazetarët flasin, kundërshtojnë, por në fund vendos qeveria me forcën e kartonit, në Kuvend.
Rakipi: Gjithë gazetarët duhet të luftojnë kundër rregjimit, kundër dikataturës, me përjashtim të disa gazetarëve që ju i keni parë, ata janë të veçuar, ata janë qesharakë,janë palaço të këtyre ditëve ku ne jetojmë. Janë shumë të dallueshëm ajo pjesë e vogël e tyre që financohen nga burime të errëta. Në rregjim ka vetëm luftë dhe gazetarët duhet të bëjnë luftën e tyre, por jo bojkot.
