Më shumë se 10 persona janë shoqëruar nga policia për të zbardhur ngjarjen e ndodhur një natë më parë ku mbeti i vrarë 23 vjeçari Andi Zylyfi ndërsa u plagos rëndë Ardit Uruçi, 21 vjeç, shok i viktimës.
Operacioni për kapjen e autorëve është drejtuar nga drejtori i Policisë Ardi Veliu i cili ka mbërritur mbrëmjen e djeshme në Elbasan pas vrasjes.
Policia ka nisur hetimet në dy pista. Atë të larjes së hesapeve mes bandash të cilat zanafillen e kanë në Itali aty ku edhe viktima ishte emigrant por edhe pista e babait te tij i cili është gardian në burgun e Peqinit.
Të shoqëruarit po pyeten për të zbardhur detaje që mund të ndihmojnë hetimet për të identifikuar autorët.
Mësohet se viktima Andi Zylyfi ka lidhje familjare me Endrit Alibej e Arben Dylgjern, të cilët mbetën të vrarë në një atentat më 29 dhjetor të vitit të kaluar, në Bradashesh të Elbasanit bashkë me shtetasin turk Erdal Duranay.
