Me pak orë gjumë ose aspak u gdhi në televizor si ndodh rëndom këto ditë dhe i quajti gazetarët “lehaqen”, vetëm pse njëri prej tyre vuri re se kryeministrit do ditë më parë iu bë sikur qeni lehu “Rama ik!” dhe ai u grind edhe me kafshën e gjorë.
Por, nuk mjaftohet me kaq, tani i duhen armiq të brendshëm më të besueshëm si shkaktarë të tërmetit. Ku ka më mirë se shkenctarët që të vihen në shtyllën e turpit, si ka ndodhur qysh nga lashtësia, mesjeta e deri në ditët tona.
Duke sjellë shembullin e SHBA, kryetari karizmatik i Rilindjes njoftoi ndryshime ligjore që në rastet e fatkeqësive natyrore të mos ketë “sharlatanë që bëjnë sizmologun e prokurorin”.
“Dëgjova që flitej për Japoni e OECD e për… në fakt meqë jemi në një situatë të jashtëzakonshem dua të ndaj me ju nevojën që në kuadrin e adresimit të problemeve të konstatuara, të marrim edhe shembullin e Japonisë, Amerikës, Izraelit, që kur ndodhin fatkeqësi të këtyte përmasave jua mbyllin gojën të gjithë atyre që s’kanë ça thonë, jua mbyllin me ligj e nuk u jepet mundësia lloj lloj të çorodisin e dëshpërojnë miletin.
Besoj se kjo do jetë, një nga gjërat që do adresojmë në reformën e përgjithshme ligjore në rastet e fatkeqësive të mëdha natyrore se nuk është e mundur që përveç halleve të mëdha populli të ketë edhe këtë hall të madh që me ditë e me netë bombardohet nga sharlatanë që shfaqen si sizmologë, inxhinierë, konstruktorë e prokurorë”.
Në përgjithësi specialistët që kanë dalë nëpër ekrane janë me dhjetra vjet eksperiencë e kanë fituar popullaritet në media, por nuk kanë treguar partishmërinë e duhur, ndaj mendohet të shpallen grup armiqësor nga prokurori i sapozgjedhur.
