Pas publikimit të rezultateve të zgjedhjeve të parakohshme në Kosovë edhe Kreu i Partisë Demokratike, Lulzim Basha ka uruar Albin Kurtin dhe Vjosa Osmanin për fitoren.
Basha i ka cilësuar këto zgjedhje si një faqe të re në rrugëtimin e Kosovës si shtet demokratik.
Basha përgëzon gjithashtu edhe forcat e tjera politike, sipas tij me qëndrimet e tyre europiane i japin garanci për ecjen përpara të Kosovës.
Reagimi i plotë i Bashës:
Kosova hapi një faqe të re në rrugëtimin e saj si shtet demokratik. Populli i Kosovës votoi për ndryshim duke mandatuar opozitën për të udhëhequr në rrugën e transformimit ekonomik dhe integrimit euro-atlantik. Urimet më të përzemërta LVV dhe LDK, Albin Kurtit dhe Vjosa Osmanit për fitoren.
Përgëzime udhëheqësve të forcave të tjera politike garuese në këto zgjedhje që me qëndrimet e tyre europiane japin garanci për ecjen përpara të Kosovës.
Dje populli i Kosovës dha një shembull frymëzues me pjesmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cënuan sekretin e votës së lirë duke e fotografuar atë. Kosova i dëshmoi botës se është një demokraci funksionuese dhe se meriton sa më parë vendin dhe rolin e saj në të gjitha institucionet dhe proceset ndëkombëtare. Urime Kosovë
