Ish deputetja e Partisë Demokratike Albana Vokshi ka reaguar me gjendjen e fundit në të cilën ndodhet Tirana, prej disa ditësh pa ujë.
Vokshi ka publikuar disa foto të denoncimeve qytetarësh që shprehen që edhe ai ujë që vjen në pak minuta është burim infeksionesh.
Në një postim në rrjetet sociale, Vokshi shprehet se për këtë shqetësim është njoftuar edhe Ministria e Shëndetësisë e cila sipas saj “nuk e ka vënë ujin në zjarr”.
Postimi i plotë i Albana Vokshit:
Propaganda e Erion Veliajt përballë realitetit me ujin e (pa)pijshëm
Bashkia e Tiranës thotë ka ujë. Qytetarët thonë nuk ka. Edhe ato pak minuta kur vjen, uji ështe shumë i ndotur, burim infeksionesh e sëmundjesh.
Në foto, e dërguar nga një banor i pallateve te Astiri, uji duket si unë moçali, por në të vërtetë ka dalë nga rubinetat e ujësjellësot të Erion Veliajt dhe paguhet si “ujë i pijshëm”.
Banorët e Astirit kanë njoftuar edhe Ministrinë e Shëndetësisë që në dt 27 gusht, por askush nuk e ka vënë ujin në zjarr. Ministrja dhe institucionet shtetërore nuk reagojnë ndaj denoncimeve që u shkojnë nga qytetarët, si denoncimi në këtë foto. Binomi hajdut qeveri-bashki, ose hesht, ose gënjen.
Kur uji moçalor që vjen në rubinetat e banorëve të Tiranës, është rrezik serioz për shëndetin, kjo nuk është më thjesht në kufijtë e papërgjegjshmërisë. Kjo është #KRIMINALE dhe kriminelët duhet të dënohen.
