Takimi i zhvilluar ditën e djeshme në Paris mes Barcelonës dhe PSG-së për rikthimin e Nejmarit ka përfunduar pa një marrëveshje.
Sipas mediave spanjolle dhe atyre franceze, dy palët nuk kanë arritur dot gjuhën e përbashkët. Kjo nuk do të thotë se çështja do të konsiderohet e mbyllur, por se do të ketë bisedime të tjera për gjetjen e formulës që do t’u pëlqejë të gjitha palëve. Paraditen e djeshme, delegacioni katalanas i përbërë nga Oskar Grau, Havier Bordas dhe Erik Abidal u takua me homologët e PSG-së.
Presidenti i këtyre të fundit, Naser Al Khelaifi nuk ishte në takim. Duket se dy presidentët qëndrojnë shumë larg njëri-tjetrit dhe kjo marrëdhënie e ftohtë mes tyre nuk ndihmon aspak në arritjen e një akordi për çështjen “Nejmar”. Katalanasit kanë dalë huq në tentativën e parë zyrtare, pasi oferta nuk është pranuar nga drejtori Leonardo. 170 milionë euro ai i konsideron pak dhe kërkon që të afrojë ndonjë lojtar në shkëmbim me brazilianin.
OFERTA- Barcelona hodhi në tavolinë ofertën e saj për të rikthyer Nejmarin në Katalonjë, e cila ishte 170 milionë dhe do të paguhet me dy këste. Sipas “Le Parisien”, katalanasit e kërkuan si huazim brazilianin me opsionin për ta blerë kartonin e tij. Emri i Dembelesë ishte gjithashtu në diskutime, por për momentin kjo ofertë nuk i ka kënaqur aspak drejtuesit e PSG-së. Dukej se në ditët e mëparshme palët kishin folur për arritjen e një marrëveshjeje, por dje nuk ishte dita e duhur.
PSG-ja nga ana tjetër kërkon që të transferojë Osman Dembelenë dhe mbrojtësin Nelson Semedo + 100 milionë euro. Për momentin, katalanasit janë të frenuar dhe nuk duan që të largojnë 2 futbollistë shumë të rëndësishëm për Nejmarin.
Me largimin e Semedos do të hapej një tjetër çështje e nxehtë për mbrojtjen e krahut të djathtë. Palët do të vazhdojnë diskutimet, sepse Nejmar e ka marrë vendimin e tij dhe nuk ka ndërmend që të qëndrojë në Paris. Në rikthimin e tij në Barcelonë, drejtori sportiv Oskar Grau thotë se nuk ka një marrëveshje, por katalanasit janë shumë pranë akordit.
TË TJERAT- Dëshira e brazilianit është Barcelona, por nëse këta të fundit nuk do të arrijnë marrëveshjen me PSG-në, atëherë janë dy skuadra të tjera që po presin zhvillimet. Bëhet fjalë për Realin e Madridit dhe Juventusin. Të dyja këto skuadra mund të fitojnë shërbimet e Nejmarit, por fillimisht duhet që të kemi një përfundim nga Barcelona.
/panoramasport/
