Artisti pukjan, Fran Gjoka, i dhuron qytetit të tij shtatoret e derdhura në Bronx
Një artist nga Puka i ka bërë dhuratë qytetit të tij shtatoren prej bronxi të Migjenit bashkë me lulin e vocërr. Si sot 80 vite më parë, Millosh Gjergj Nikolla shkoi në Pukë si mësues atje ku zë fill edhe tregimi i tij i famshëm,: “Luli i vocërr”. Ai kthehet pas 80 viteve i derdhur në bronx bashkë me personazhin e tij.
Diplomati Flamur Gashi përcjell fotografitë e ceremonisë së vendosjes së shtatores së Migjenit dhe një dedikim për artistin, Fran Kola, i cili i bëri dhuratë qytetit të tij statujën e poetit të madh shqiptar.
“Millosh Gjergj Nikolla – MIGJENI, sot kthehet se bashku me Lulin … i derdhur ne bronz.
Miku im i mire Fran Gjoka, artisti dhe humanisti nga Puka qe jeton ne Detroit – SH.B.A, ja beri dhurate kete shtatore qytetit te tij te lindjes… Një punë shumë e mirë e skulptorit Ardian Pepa”, shkruan Flamur Gashi.
Luli i Vocerr
Askush s’e njef Lulin. As shokët e tij, që përpara tij lozin, nuk e njofin. Ma mire me thanë se e njofin, por ata lozin për hesap të vet e Luli i shikon për hesap te vet. Sot gjithkush ka punet dhe telashet e veta, ashtu dhe fëmijtë, ashtu dhe Luli. More Lul! Shumë heret ke fillue me shikue punën tande!
Kur Luli hyn n’oborr të shkollës, buza i qeshet nga pak, por askuj, asnji fjalë s’i thotë. Ecë ngadale, tue shikue djathtas e majtas, po gjithnji tue ecë deri sa të mbrrijë në cak të vet. Aty, te dera e rruginës shkollore, shumë i pëlqen të qëndrojë. Aty asht caku i tij, i praruem me rrezet e ngrofta të diellit në këto ditët e vjeshtës. Mbështetet Luli për mur, grushtat e vogjël i shtje ndër xhepa, hundën picrroke të kuqun nga të ftoftit e mëngjesit ja sjell diellit dhe…shikon.
Gjaja që ma tepër tërhjek vëmendjen janë çizmet që i kanë të veshun disa shokë të tij. Sa te bukura janë! Si shkëlqejnë! – mendon Luli dhe pa dashtje i shkojnë sytë ndër tullumbat e veta, nëpër të cilat shifen fare mirë të pesë gishtat e kambëve të zbathuna. Nga kurreshta i afrohet nji shokut që ka çizmet ma të reja. Ulet dhe shef në lustrin e çizmes kambët e veta të zbathuna – aq shumë shkëlqejshin çizmet!!! Mbasi shoku me çizme fluturoi, Luli ngadalë shkoi te caku i vet, në diell, t’i ngrohi kambët. – Por kur s’ka diell, si ia ban i shkreti Lul? Ndoshta ia bajnë hallin apostujt e mëshirës dhe të dashunis… Noshta, ndoshta…
Nganjiher i afrohet mësuesi Lulit. Dhe kur Luli e ka ftyrën e dlirë dhe pa puça, mësuesi ia ledhaton faqet, gushën, e Luli i afrohet, ja merr dorën, e shikon me sy pëllumbi, dhe kishte me dashtë t’i falë diçka mësuesit. Por vjollca nuk ka. Veç në i faltë tollumbat e veta, që kanë hapun gojën si me dashtë me e hanger mësuesin. Po, po, tollumbat e Lulit të vocërr kanë me e hangër mësuesin.
