Tani ka ardhur edhe koha e stadiumeve. Deri tani kemi pasur disa ngrehina për turp, të përshtatshme vetëm me nivelin e futbollit që luhej në vend. Ndërkohë as edhe minimum i respektit për njerëzit e shkallëve, aq sa me kalimin e kohës filluan t’i braktisnin fare impiantet, që ishin kthyer si vende për kryerjen e dënimit. Aq keq u agravua gjendja, saqë nuk gjendej më asnjë stadium i liçensuar nga UEFA dhe FIFA, për të luajtur qoftë edhe një ndeshje ekipi përfaqësueses dhe kështu që shfrytëzonim dashamirësinë e inspektorëve që vinin dhe mbyllnin sytë për kushtet mizerabël të “Qemal Stafës”. Tashmë është bërë një rikonstruksion i pranueshëm dhe kemi “Elbasan Arenën” me kushte normale. Po përfundojnë punimet në stadiumin “Loro Boriçi” të Shkodrës dhe shumë shpejt edhe ai do të liçensohet.
Eshtë vendosur përfundimisht që më datë 21 prill të fillojnë punimet në “Qemal Stafa”, fillimisht duke e shembur dhe më pas duke e ndërtuar nga e para. Do të flitet për një stadium nga më të mirët në Ballkan, me një arkitekturë moderne, të përshtatshme me pozicionin ku ndodhet në qendër të kryeqytetit. Sipas kontratës së nënshkruar, dy vjet nga fillimi i punimeve, firma që ka fituar tenderin është e detyruar ta dorëzojë të përfunduar stadiumin e ri. Ndërkohë, klubi i Partizanit do të ndërtojë një stadium të vogël, me kapacitet 4500 vende, madje edhe në këtë rast do të ketë asistencën e FSHF-së. Sponsorizuesit e rinj të Flamurtarit kanë vendosur tqashmë të ndërtojnë stadiumin e ri të Vlorës, duke e plotësuar kështu dekorin e ri të futbollit shqiptar.
