Nënkryetari i PD, Edi Paloka ka ironizuar sot pritjen që iu bë kryeministrit Edi Rama në Shkodër.
Përmes një postimi në facebook, Paloka shkruan se kur lëviz kryeministri duket sikur po dislokohet ndonjë bazë e NATO-s, nisur nga forcat që e shoqërojnë.
“Në Kukës shkon me helikopter!
Në Malësi të Madhe kalon ferrash!
Kryeministrinë dhe Parlamentin i ka rrethuar sikur të jetë në Rripin e Gazës e jo në kryeqytetin e një vendi që pret të anëtarësohet në BE.
Kur lëviz rrugëve me makinë, të krijohet përshtypja sikur është duke u dislokuar ndonjë bazë e NATO-s aq shumë mjete e forca e shoqërojnë.
Një ushtri me bodyguard-ë iu kontrollojnë deri të mbathurat edhe ministrave përpara se të ulen për drekë me të!
Surreli “i merr të keqen” Bllokut të dikurshëm se në çdo ferrë e mullar bari ka nga një rojë. Kalamajtë e fshatit as balona nuk ngrenë dot më në Surrel, se i rrethon Garda dhe i asgjëson si rrezik për sarajet e liderit suprem.
Antiplumbin nuk e heq as kur futet në dush!
E megjithatë vazhdon të bëj “cubin” arrogantin dhe të fortin.
Zoti ja shtoftë inatin…!”, ironizon Paloka.
