Studentët e UBT po vazhdojnë protestën e tyre duke deklaruar se do të tentojnë të rrëzojnë pjesën rrethuese. Ata kanë dalë në protestë për të penguar vijimin e punimeve për ndërtimin e një shkolle në truallin e Universitetit të tyre.
Studentët janë shprehur se kjo protestë mund të jetë dhe fillimi i një tjetër proteste masive nga gjithë studentët.
Gjithashtu ata bëjnë me dije se pjesa më e madhe e pedagogëve dhe studentëve e mbrojnë këtë kauzë, ashtu sikurse ka dhe disa pedagogë që janë kundër kësaj proteste.
“Një mendje po na jep të heqim pjesën rrethuese që tregon që kjo është shkolla jonë, është Universiteti ynë. Është e pakonceptueshme të ndërtohet një shkollë 9-vjeçare. Ne do të qëndrojmë më gjatë se banorët e Astirit në protestë. Senati Akademik është kundër uzurpimit të këtij territorit. Një pjesë e profesorëve që kanë dalë kundër protestë më duken ose sikur janë të blerë ose sikur i kanë hedhur trutë e gomarit.” kanë deklaruar studentët.
Kujtojmë që Kryebashiaku Erion Veliaj para një viti ka mbjellë ullinj dhe pemë, dhe do të duhet që të gjitha këto pemë të shkulen dhe investimet do të shkojnë dëm për ndërtimin e një shkolle.
