Rama kërcënon popullin amerikan, Basha i mëson si të mbrohen…
Politika shqiptare vazhdon të ecë përpara me parimin e “Fanarit ndriçues”.
Kryeministri Rama dhe kryetari i opozitës Lulzim Basha i kanë zgjidhur të gjitha problemet e brendshme dhe janë hedhur t’i japin një dorë situatës ndërkombëtare. Dy liderët tanë të lavdishëm po përpiqen të zgjidhin “hallet” e fushatës presidenciale në SHBA.
Kryeministri Rama ka kërcënuar seriozisht popullin amerikan që nëse zgjedhin President Donald Trump, Shqipëria do të rishikojë marrëdhëniet me Amerikën.
“Unë e kam thënë hapur çfarë mendoj për Donald Trumpin, dhe nuk e kam fare problem ta përsëris as në shqip as në anglisht, që Trump është kërcënim për Amerikën dhe nuk diskutohet që është këcënim edhe për marrëdhëniet e Shqipërisë me Amerikën, do të thotë që mos e dhëntë Zoti që amerikanët ta zgjedhin President se do të ishte një President që do t’i bënte dëme të mëdha Amerikës dhe sigurisht do të ishte një kërcënim real për marrëdhëniet shqiptaro-amerikane”, ka thënë kryeministri ynë.
Në mbrojtje të popullit amerikan ka dalë shpejt e shpejt kryetari i PD-së, Lulzim Basha.
“Lideri global ka marrë së fundmi një angazhim mbi të zakonshmen, ka vendosur të mësojë amerikanët si të zgjedhin Presidentin e tyre. Nuk është nga ato pleqërimet me Koçon te lapidari i Vunoit, është një punë që kërkon ta bëjë tani, sa më shpejt. Pasi e ndriti në Shqipëri, duke vendosur krizën dhe varfërinë më të thellë, duke instaluar oligarkinë kriminalo-korruptive, duke konkuruar edhe Trumpin për pasuri personale, pasi shkel çdo ditë ligj dhe Kushtetutë, kokoshi ka gati recetën për Presidencialet amerikane. Arroganca dhe deliri si rregull e kanë një kufi, por lideri botëror po tregon se për të, këto çrregullime janë të pamata. Amerikanët shpesh e gjejnë një Borat për të kaluar ca orë në ekrane apo kinema. Kësaj rradhe regjisorët s’kanë nevojë të lodhen shumë. Personazhi është vetëofruar”, thotë Basha.
Me siguri situata në Amerikë është tash më e qartë dhe populli amerikan do të dijë të marrë vendimin e duhur, falë asistencës së dy udhëheqësve stoikë shqiptarë.
