Situata është me të vërtetë serioze. Taulanti i është drejtuar elektoratit të PS-së me një thënie të Sharl dë Gol, që t’i bindë ata të votojnë në referendumin e 9 Prillit.
Deputeti i plotfuqishëm socialist, i Librazhdit, Elbasanit dhe gjithë Shqipërisë, i kërkoi sot të gjithë socialistëve të votojnë më 9 prill të dalin në votime për referendumin pasi rëndësi ka pjesëmarrja jo rezultati. Taulanti e nis kështu thirrjen e tij: “Për një prej liderve më të mëdhenj të shekullit XX dhe etërve themelues të Bashkimit Europian, Sharl dë Gol, “politika është një gjë shumë serioze për t’ua lënë në dorë vetëm politikanëve. 
Referendumi i 9 prillit përbën një ushtrim demokratik, të cilin ne e fusim në jetën politike të partive për herë të parë, por që synojmë ta përdorim edhe për çështje të tjera”.
Dhe e mbyll kështu: Prandaj çdo socialist është i ftuar që përmes votës së tij të bëhet pjesë e kësaj ngjarjeje të posaçme, ku objektivi madhor nuk është rezultati, po pjesëmarrja masive. Nuk është çudi që deri të shtunën kur mbahet referendum Taulanti të dalë me ndonjë parullë të kolosëve të partisë së tij: Socialistë të të gjitha qyteteve e katuneve bashkohuni të votojmë referendumin!
