Tritan Shehu është ndër politikanët që Ambasadori Lu i tërhoqi vëmendje për pozicionimin kundër komunitetit LGBT.
Ai duke këmbëngulur në mendimin e tij e quan të papërshtatshme këtë deklaratë të ambasadorit amerikan në Tiranë.
“Deklaratë jo e përshtatshme e Ambasadorit Lu, ndaj bindjeve të mia personale për homoseksualizmin, në një konferencë të “pilotuar”: Unë si deputet i Kuvendit, si përfaqësues i Qendrës së Djathtë dhe i elektoratit të Qarkut të Gjirokastrës kam të drejtën time të shpreh edhe bindjet e principet e mia personale për të tilla çështje, kuptohet brenda ligjeve të vendit tim. Siç unë i respektoj bindjet e të tjerëve, kërkoj nga kushdo të respektojë edhe të mijat, kjo është demokracia; sot jam shokuar!
Është vetëm elektorati im, ai që mund të më gjykojë për ato. Prandaj duke marrë shkas nga prononcimi Juaj Z.Ambasador i emrit tim, referimi që i bëtë elektoratit të Qarkut të Gjirokastrës për çështje thjesht bindjesh, dua ta risqaroj atë popullësi fisnike se unë jam kundër çdo forme diskriminimi si mjek, si Profesor, si deputet e në radhë të parë si Njeri, gjë që më ka shtyrë të jem edhe një nga promotorët e Ligjit Kundër Diskriminimit. Po kështu për mua ka ca principe të Shenjta, një nga këto është mbrojtja e familjes e përbërë nga burri, gruaja e me shpresë më tej fëmijët, si themel i ekzistencës njerëzore e vlerave më sublime të shoqërisë.
Nga ana tjetër gjykoj se rritja e një fëmije të adoptuar nuk mund t’i besohet çifteve gay. Këto janë parimet që unë kam mbrojtur pa diskriminuar kërkënd, që janë te sanksionuara në legjislacionin shqiptar dhe që mbizotërojnë në elektoratin tim. Nqs dikush dyshon për këtë, mund ta testoje atë në çdo rast; jam gati ta ndihmoj. Nga sa di unë edhe në shumicën dërrmuese të SHBA-se dominojnë të tilla principe e ligje. Ndërsa në lidhje me gjuhen e rëndë të përdorur ndaj kolegëve deputetë nga deputetja Hysi, si dhe për devijimin e asaj konference prej çështjeve të diskriminimit, tek propaganda për martesat gay, do të diskutoj në Kuvend. Isha i detyruar të bëj këtë skjarim, megjithëse tashmë Shqipëria ka çështje shumë më të rëndësishme për të zgjidhur se këto”, tha Tritan Shehu.
