Qeveria ka nisur negociatat me koncesionarin për tarifën për banorët e zonës që qarkullojnë në Rrugën e Kombit. Burime qeveritare kanë konfirmuar për Report TV se po diskutohet pajisja me abone dhe tarifa për banorët lokal do të jetë 2 euro.
Megjithatë asgjë nuk është vendosur ende dhe çfarë do të arrihet nga bisedimet me koncesionarin do të bëhen publike nga qeveria në ditët në vijim. Disa ditë më parë kryeministri Edi Rama deklaroi gjatë një konference për shtyp se për banorët e zonave të Kukësit do ketë një sistem të posaçme pagese i cili do marrë 6 muaj kohë për identifikimin e përdoruesve të rregullt të rrugës.
Kreu i qeverisë tha se firma koncesionare do aplikojë abone për automjetet e banorëve të zonave përreth të cilët kalojnë më shpesh në autostradë, ndërsa deklaroi se tarifa 5 euro mbetet e panegociueshme.
