Nga Erion Kristo
Këto ditë vërehet një dukuri masive ku këshilltarë vendorë të LSI kalojnë te PS. Fakti që po ndodhin në të njëjtën kohë tregon se ka një fushatë të fuqishme blerjesh. Ky është një akt i ndyrë antidemokratik që cenon rëndë të drejtat e qytetarëve dhe shtrembëron vullnetin dhe votën e tyre.
Personat e zgjedhur nga qytetarët u shërbejnë parave dhe pushtetit. Kuptohet se cila do jetë ardhmëria që do prodhojë ky proces. Mendoni në duart e kujt është e ardhmja e fëmijëve tanë.
Nga ana tjetër nuk mund të mos theksoj gjithashtu dhe përgjegjësinë që mban LSI dhe partitë e tjera lidhur me këtë situatë. Besoj se u kujtohen reagimet e mia përpara dhe pas listave për deputetë dhe këshilltarë, ku kërkoja jo thjesht militantë injorantë, por qytetarë të spikatur dhe me dinjitet. Po partitë zgjodhën në lista askushët, madje disa ishin dhe kriminelë. Dhe kur injoranca vjen në pushtet sillet kështu me pushtetin. Juve duhet të kërkoni falje publike që mandatuat llumin. Dhe jo thjesht të shfaqeni si viktima të pushtetit.
Ky akt i pështirë i ndërrimit të kampit politik duhet të ndalohet me ligj. Urgjent!
