Borxhet e vjetra të ujit, Gjiknuri: Të miratohen skema lehtësuese

Ministri i Infrastrukturës dhe Energjisë Damian Gjiknuri së bashku me Ministren e Kulturës Mirela Kumbaro, në cilësinë e deputetes së zonës, kanë inspektuar kantierin e punimeve për rehabilitimin e ujësjellësit në Përmet.

Sipas kontratës, brenda 30 muajsh investimi do të mundësojë furnizimin me ujë 24 orë duke i dhënë zgjidhje kështu një problematike mbi 25 vjeçare.

“Është një investim që kap një vlerë rreth 5 milion USD, zgjidh përfundimisht çështjen e ujit në Bashkinë e Përmetit duke siguruar ujë 24 orë. I ftoj qytetarët që deri në fund të Janarit, vullnetarisht të bëjnë lidhjen në mënyrë legale me rrjetin e ujësjellësit kudo që ata janë sepse qeveria në Shkurt do të fillojë masat për kontrollet sëbashku me autoritetet vendore”, theksoi ministri Gjiknuri.

Ministrja e Kulturës Mirela Kumbaro, vuri theksin tek mbajtja e premtimit që i është bërë qytetarëve të Përmetit.

“E rëndësishme është që ne e mbajtëm premtimin dhe sot jemi këtu për të ndjekur punimet. Do të vazhdojmë të jemi deri në fund të zbatimit të projektit, derisa çdo qytetar i Përmetit të ketë në rubinetin e vet atë që dëshiron, gjënë më të rëndësishme, ujin”, u shpreh Kumbaro.