Nga Arbjola Halimi
Drejtuar:
Presidentit të Republikës, Z. Ilir Meta (në cilësinë e institucionit që dekreton titullarin në fjalë)
Ambasadorit Amerikan, Z. Donald Lu (në cilësinë e institucionit që ndjek me interes të veçantë zhvillimet në këtë vend).
Shënim: Kjo nuk ështe një kuje për një hall personal pasi për këtë i jam drejtuar gjykatës, por një kuje për një hall të madh social.
I nderuar President i Republikës, i nderuar Z. Ambasador i SHBA, pas mbarimit të mandatit tim si deputete e Qarkut të Elbasanit, në shtator të këtij viti unë ju drejtova me një shkresë (sikurse të gjithë kolegët e mi të rikthyer tashmë) Rektorit të Universitetit të Elbasanit, për rikthim në vendin tim të mëparshëm të punës. Theksoj se kjo kërkesë mbështetej thellësisht në ligj ( ligji për statusin e deputetit).
Jo vetëm që nuk u riktheva por:
- Së pari mora një përgjigje të shtrembëruar e të pambështetur ligjërisht se nuk mund të rikthehem
- Dy muaj me rradhë, pas tre kërkesash të protokolluara, nuk pajisesha me vërtetim se kam qenë në punë në këtë Universitet. Madje, pas kërkesës se parë mora një vërtetim me të dhëna të rreme vetëm e vetëm për të më goditur. Kjo sigurisht për të penguar plotësisht çdo aplikim të mundshëm në çdo universitet tjetër
- Ministria përgjegjëse refuzoi të më takoje dhe më vonoi gati 20 ditë ankimin ku sigurisht harroi se ka për detyrë të kontrollojë zbatueshmërinë ligjore ( le të shoh ligjin ministria) të Universiteteve dhe se fjala autonom nuk përdoret kur të leverdis. Asnjë titullar nuk është Zot mbi tokë. Kujtoj së gjatë mandatit kam qenë një nga kritikueset kryesore të ligjit për arsimin e lartë dhe nuk e di nëse sulmohem edhe për këtë qëllim.
Në të gjithë këtë histori unë e kam të pamundur të besoj se është thjesht një aferë e një vendi pune dhe se goditja ndaj meje është thellësisht politike.
Për më konkretisht, Pseudo Rektori aktual ( i zgjedhur pa kandidatë përballë) rastis të jetë nga Peqini. Unë me “Peqinin” i kam pasur ca halle pasi kandidonim në të njëjtën zonë dhe vijmë nga i njëjti komunitet. Se dyti, në zgjedhjet e 25 qeshorit binomi PS-PDIU u bë i pandashëm. Së treti, juristja aktuale në UE është ish juristja e Qazim Sejdinit, me lidhje edhe sot ndërsa ai i financon qendrën që ajo ka ngritur për fëmijë. E mësuar gjithashtu me qelitë.
Se katërti, theksoj se nuk kam pasur kurrë një konflikt personal me titullarin në fjalë. Nuk kam dyshimin as me të vogël se gjitha kjo është një Bande e Organizuar Kriminale e Politike. Për ta argumentuar: Ku e gjen guximin një Rektor të shkelë ligjin nëse nuk ka mbështetje nga lart? Ku e gjen motivimin po ashtu? Cili është ai Universitet që refuzon të ktheje në punë një ish deputet kur të gjithë vendosen në garë t’i mbajnë? Rast unik i padëgjuar dhe ndodh në Elbasan.
I nderuar President i Republikës, i nderuar Ambasador, pyetja që kam unë është se a është normal një shtet i tillë? A jemi duke bërë përparime Z. Ambasador? Kur një ish deputet trajtohet në këtë mënyrë çfarë ndodh me njeriun e thjeshtë? Atë të thjeshtin fare, që nuk e njeh askush e nuk njeh askënd. A mjafton ligji për t’i luftuar bandat qeverisëse?
I nderuar Z. Ambasador duke besuar ende por fare pak se drejtësia mund të kulmojë dhe se ende mund të ketë shpresë në këtë vend, shpresoj që ajo Reforma në Drejtësi që votova me dorën time të jetë vërtete e tillë.
