Meqenëse nuk sheh asnjëherë televizor, Papa Françesko duhet të jetë i vetmi argjentinas i gjallë që nuk e ka shijuar asnjëherë magjinë e Leo Mesit me topin. Deri përpara se të zgjidhej në krye të Selisë së Shenjtë, ekzaktësisht tre vjet më parë, Horge Mario Bergolio ndiqte në radio ndeshjet e skuadrës së tij të zemrës, San Lorenco. Ndërsa tani për arsye impenjimi nuk e bën më as një gjë të tillë. Tashmë Papa ka ndryshuar “strategji”, duke zgjedhur një grup të rojeve zvicerane, të cilët e informojnë pothuajse në kohë reale për gjithçka rreth skuadrës së drejtuar nga Pablo Guede, e cila po bën mirë gjatë këtij sezoni, si në kampionat ashtu edhe në kupën Libertadores.
