Nga Çapajev Gjokutaj
Librat e shenjtë thonë – në ferr. Me sa mund të hyjë deveja në vrimën e gjilpërës, aq mund të hyjë edhe i pasuri në parajsë. Dhe Jobs kur vdiq qe i krimbur në para, kishte bërë 10 miliardë $. Dhe thuajse të gjitha i kishte mbajtur për vete e për të afërmit.
Hera herës mendoj se mund të jetë bërë një përjashtim. Vërtet Jobs ishte i krimbur në para, por kishte lehtësuar jetën e miliarda njerëzve me shpikjen e iPhone, iPad, iTunes dhe 400 e kusur shpikje të tjera.
Herë të tjera blasfemoj e them se i Gjithëfuqishmi do të ketë vënë re që të kamurit nuk janë si qëmoti. Pasurinë s’e përdorin vetëm për pallate e kështjella, as nuk e fshehin në qypa.
E investojnë, duke krijuar vende pune, mallra e shërbime. Këto vërtetë ua shumëfishojnë kamjen, por lehtësojnë edhe jetën e miliona njerëzve. Jo me sadaka.
Ndonjëherë shoh gjyshin në ëndërr. Tund gishtin dhe më hakërrehet: po ti pizeveng me kë je, me zengjinët apo me fukarenjtë?
( Nga cikli ‘Monopatet e ironisë’ )
https://www.facebook.com/cgjokutaj?hc_ref=ARRuynZiSz2UO2aijq5ZeSIIP19G45d10xJFajaW29W6AmruEne6I1T7G8MYr0oCg9k&fref=nf
