Kreu i Kuvendit, njëherësh kreyetar i LSI-së, mohoi të kishte një marrëveshje me Ramën për mirtimin e Reformës në Drejtësi me votat e mazhorancës
Kryetari i Kuvendit Ilir Meta doli sot para mediave për të qartësuar edhe një herë qëndrimin e LSI-së për reformën në Drejtësi. Pasi Komisioni i Venecias publikoi raportin e fundit zyrtar për reformën në Drejtësi, kryetari i LSI-së i bën thirrje partive politike ta lexojnë siç duhet atë dhe të nxitohet për të miratuar reformën në drejtësi bazuar vetëm në rekomandimet e Komisionit të Venecias.
“Meqënëse kemi opinionin final dhe zyrtar të Komisionit të Venecias, qëndrimi zyrtar i LSI-së për këtë reform kushtetuese është i qartë. 20 votat e LSI shkojnë për atë reformë për të cilën është shprehur Komisioni i Venecias dhe aty ku nuk do të kemi qartësinë e duhur për të bërë interpretimin e neneve, do kërkojmë rekomandimet e misioneve EURALIUS dhe OPDAT. 20 votat e LSI do të jenë në mbështetje të standarteve që ka rekomanduar Komisioni i venecias”, tha sot Meta.
Kryetari i Kuvendit njëherësh kryetar i LSI-së qartësoi sot qëndrimin e partisë së tij për reformën në Drejtësi, duke përjashtuar planin B të kryeministrit Rama se drafti i Reformës në Drejtësi mund të votohet edhe pa opozitën.
“LSI është e angazhuar për një klimë konstruktive dhe bashkëpunuese do të vazhdojë të luajë këtë rol pa u lodhur dhe me durim me qetësi dhe me qartësi. LSI ka vetëm një plan. Plani i LSI-së, është të votojë reformën në drejtësi. Ne jemi shprehur se Komisioni i Venecias është gjykatësi suprem për këtë reformë dhe askush tjetër. Venecia është shprehur për këtë reformë dhe në opinionin e Venecias është qartësuar tashmë çdo gjë. Nuk ka asnjë plan tjetër LSI përveçse të shprehet pro rekomandimeve të Komisionit të Venecias”, tha Meta.
